Gandeiros tiran 15.000 litros de leite procedente de Portugal que ía á planta de Inleit
Unións Agrarias advirte que non vai permitir que a industria recorte os prezos que paga ás granxas valéndose da importación de leite doutros países.
Gandeiros interceptan un camión en Teixeiro (A Coruña) e tiran leite procedente de Portugal – UNIÓNS AGRARIAS
Comentarios
As protestas contra os recortes que propón a industria na renovación dos contratos lácteos de abril e pola entrada de leite estranxeiro en Galicia intensifícanse. Un grupo de gandeiros interceptou un camión este venres en Teixeiro (A Coruña) e tiraron uns 15.000 litros de leite procedente de Portugal. Segundo informa Unións Agrarias, este leite tiña como destino a planta de Inleit en Teixeiro, unha das empresas que plantexa unha rebaixa agresiva nos pagos ás granxas.
Esta acción forma parte da campaña de actuacións que a organización agraria leva a cabo nos últimos días para denunciar a entrada de leite de Portugal e Francia en Galicia coa que se busca unha baixada de prezos. O pasado sábado, xa entraron nun centro de Cash Galicia no polígono de A Sionlla, en Santiago, para tirar cartóns de leite estranxeiro nun contexto de negociación de novos contratos no que a industria realiza propostas á baixa.
“A Xunta di que non atopa indicios dunha entrada masiva de leite estranxeiro que está a distorsionar o mercado. A nós chegáronnos con poñernos ás portas das plantas para comprobar a constante entrada das cisternas“, afirma Unións Agrarias. “Se as administracións non actúan, teránnos enfronte”, avisa.
“Non imos permitir que as industrias continúen impondo prezos e poñendo contra as cordas ás granxas, ignorando a Lei da Cadea e forzando rebaixas inasumibles e inaceptables mentres engrosan a súa conta de beneficios a costa de importar leite a prezo de saldo”, advirten.
