Inditex acelera coa moda ‘responsable’ cun etiquetado pioneiro para persoas con discapacidade visual
Todas as marcas do grupo poñen en marcha un sistema de etiquetas que, ao escanearse desde as súas aplicacións, permiten acceder mediante audio a información sobre os produtos sen necesidade de enfocar o código QR.
Novo sistema de etiquetado accesible de Inditex, presente en todas as tendas do grupo. Foto: Inditex
Comentarios
A Inditex de Marta Ortega aposta forte pola súa etiqueta de multinacional responsable. Dentro desa inversión, tamén reputacional, os de Arteixo puxeron en marcha un sistema pioneiro dentro do mundo da moda para facilitar a experiencia de compra a persoas invidentes ou con algunha discapacidade visual mediante os seus teléfonos móbiles.
Anunciouno o CEO da compañía, Óscar García Maceiras, no seu discurso no marco da xunta xeral de accionistas da compañía. O método é sinxelo (polo menos para o cliente). Mediante unha tecnoloxía propia desenvolvida coa marca especializada NaviLens, as persoas con discapacidade visual, a partir da propia app de Zara e das distintas marcas do grupo poderán enfocar, sen que faga falta precisión, a etiqueta dos produtos e recibir información auditiva de forma inmediata.
A iniciativa incorpora nas etiquetas das prendas un novo código integrado xunto ao QR xa existente. Mediante a integración de tecnoloxía da empresa española NaviLens -especializada en solucións tecnolóxicas para mellorar a autonomía das persoas- e grazas ás funcionalidades de accesibilidade do propio teléfono, os usuarios poderán recibir en formato auditivo no idioma no que teñan configurado o seu teléfono información sobre o produto, como a súa descrición, prezo, cor ou talla, facilitando unha experiencia de compra máis independente.
O despregamento das etiquetas
As novas etiquetas comezaron a incorporarse aos produtos o pasado 1 de xuño nun despregamento progresivo que se realizará de forma simultánea en todo o mundo e en todas as marcas comerciais de Inditex e que se completará coas prendas da colección primavera/verán 2027. Ata entón, convivirán nas tendas prendas co novo sistema de etiquetado e outras que manteñen o formato anterior.
O proxecto é froito do traballo conxunto de distintos equipos de Inditex para desenvolver unha solución integrada, escalable e plenamente compatible cos procesos globais de etiquetado do Grupo. Para iso, a compañía colaborou co Grupo Social ONCE, cuxa participación resultou clave para validar e optimizar a experiencia de uso na tenda.
Nunha segunda fase, prevista para o final do ano, esta tecnoloxía incorporarase tamén ás etiquetas internas das prendas. Esta nova funcionalidade permitirá que as persoas con discapacidade visual poidan identificar máis facilmente a súa roupa unha vez na casa.
Mediante a lectura do código co seu teléfono móbil, poderán coñecer a descrición de cada prenda -diferenciándoa doutras similares- e consultar información como a súa composición ou as instrucións de coidado e lavado.
