Stolt Sea Farm activa un investimento de 20 millóns na súa nova planta en Cervo para cultivar linguado

Stolt Sea Farm suma e segue. A compañía norueguesa colocou este martes a primeira pedra da súa nova nave de linguados (edificio RAS II) no concello de Cervo, que leva aparellada un investimento de uns 20 millóns de euros, dos cales algo máis de 13 proceden de axudas da Xunta de Galicia.

O presidente da Xunta, Alfonso Rueda, asistiu a este acto no que recoñeceu o “compromiso real” da compañía e o seu “ritmo de crecemento extraordinario”. Valora que a pesar dos “orixes afastados” da norueguesa Stolt Sea Farm, o seu “centro de operacións mundial téñeno en Galicia“.

Rueda iniciou o seu discurso co pésame ao compoñente de Cantigas e Agarimos falecido en Agolada, quen traballaba nesta empresa, e a continuación puxo en valor que a multinacional norueguesa crece e “crea riqueza”, polo que “ten moitísimo futuro a acuicultura responsable”.

Alfonso Rueda presidiu o acto no que Stolt Sea Farm colocou a primeira pedra da súa nova nave de linguados en Cervo

Acompañado da conselleira do Mar, Marta Villaverde, e da alcaldesa de Cervo, Dolores García, Rueda resaltou que os directivos de Stolt Sea Farm “sempre insisten moito” en “ser sostibles e mirar cara o futuro”, de modo que aposta por combinar a calidade e o respecto ao medio ambiente nestas instalacións de máis de 400 toneladas anuais de capacidade de produción e 7.000 metros cadrados de superficie.

A voltas co Regulamento de Costas

En paralelo, Rueda reiterou as críticas ao Goberno que a Xunta realizou nos últimos meses pola reforma do Regulamento de Costas, xa que o Executivo central “parece volver a cometer os erros de antano” e “provocar inseguridades xurídicas”.

“Faremos todo o posible para que as nosas competencias sexan exercidas sen interferencias por parte do Goberno central, que parece que non quere entender algunhas cousas”, defendeu, antes de subliñar que hai “investidores fiables que están dispostos a investir” se existise máis certidume.