Inditex sofre un ciberataque con acceso ás súas bases de datos
A multinacional asegura que non se viron afectados datos persoais ou bancarios tras o acceso ás súas bases de datos, aloxadas nun terceiro.
Vista exterior das instalacións de Inditex en Arteixo.
Comentarios
Inditex detectou un acceso non autorizado ás bases de datos do grupo, que conteñen información sobre a relación comercial con clientes de diferentes mercados. O ataque informático non afectou, segundo detalla a multinacional, a información persoal nin bancaria. En concreto, sinala que non quedarían expostos datos tales como nomes e apelidos, teléfonos, domicilios, contrasinais, tarxetas bancarias ou outros medios de pago. As bases de datos estaban aloxadas nun terceiro.
“Inditex aplicou inmediatamente os seus protocolos de seguridade e iniciou a notificación ás autoridades correspondentes sobre este acceso non autorizado, que ten a súa orixe nun incidente sufrido por un antigo provedor tecnolóxico que afectou a diversas compañías con actividade internacional”, explica nun comunicado.
As operacións e os sistemas do xigante téxtil non sufriron afectación algunha e os clientes poderán seguir accedendo e operando con total seguridade.
