Inxección de cinco millóns da Xunta para o desembarco de Seafood Legacy e a súa planta de salmón en Burela

Novo impulso da Xunta de Galicia a Seafood Legacy Spain. O Instituto Galego de Promoción Económica (Igape) asinou este mércores o acordo coa filial da empresa norueguesa para que esta poña en marcha a súa planta de cría de salmóns en Burela.

O Igape apoia cun préstamo de cinco millóns de euros a posta en marcha da que será a primeira instalación deste tipo en solo galego e que ocupará unha parcela de preto de 20.000 metros cadrados no porto burelés. Segundo as estimacións da empresa, arredor desta factoría xirarán ao redor dun cento de postos de traballo directos e indirectos.

Na sinatura estiveron presentes representantes das entidades financeiras colaboradoras (Banco Santander e Abanca) e do Instituto de Crédito Oficial (ICO). Ademais destes cinco millóns a través do Igape, Xesgalicia (a xestora de fondos de capital risco da Xunta de Galicia) destinou outros 3,5 millóns de euros a este proxecto que captou 25 millóns co Fondo Europeo de Pesca e Acuicultura (Fempa).

“A acuicultura consolídase como un dos sectores con maior potencial de futuro para Galicia, tanto polo seu arraigo na economía do mar como pola súa capacidade para integrar innovación, tecnoloxía e sustentabilidade. Neste contexto, o proxecto promovido por Seafood Legacy é unha iniciativa de relevancia para avanzar na modernización do sector e reforzar o posicionamento da comunidade como referente internacional”, destaca a Xunta de Galicia.

100 millóns de investimento

Con este apoio, o Executivo autonómico allana este investimento valorado en máis de 100 millóns de euros que irá destinado a desenvolver unha acuicultura moderna, eficiente e de alto valor engadido, aliñada cos retos globais de sustentabilidade e seguridade alimentaria.

A sinatura do acordo supón un fito clave para a posta en marcha da iniciativa e permitirá avanzar na construción dunha instalación que terá un impacto moi significativo na economía da comarca de A Mariña lucense, coa xeración de emprego e a dinamización do tecido produtivo.

“O acordo de financiamento foi posible grazas á colaboración da Consellería de Economía e Industria da Xunta de Galicia, a través do Igape e XesGalicia, xunto co Instituto de Crédito Oficial (ICO) e as entidades financeiras Banco Santander e Abanca, nun exemplo de implicación conxunta das institucións públicas e privadas”, recalca o Executivo autonómico.

Mediante un comunicado, a Xunta destaca que “a futura instalación empregará tecnoloxía RAS, que permite optimizar o uso da auga, mellorar a bioseguridade e reducir significativamente o impacto ambiental fronte aos modelos tradicionais de acuicultura. Unha vez operativa, a planta contribuirá ao fortalecemento do sector acuícola galego, ao desenvolvemento económico rexional e á consolidación dun modelo produtivo máis innovador e sostible”.