O Igape promove a mellora tecnolóxica das empresas galegas cunha inversión de 50 millóns.
A Xunta destinará o orzamento a cinco programas de apoio que permitirán, entre outros, fomentar unha oferta tecnolóxica propia de Galicia ou atraer talento directivo ás empresas que axude a executar proxectos de innovación.
María Jesús Lorenzana, conselleira de Economía, en su visita a las instalaciones de Trison. Xunta
Comentarios
A Xunta destinará o próximo ano case 50 millóns a cinco programas de apoio do Instituto Galego de Promoción Económica (Igape) para impulsar a tecnoloxización das pequenas e medianas empresas galegas.
Este orzamento axudará ás pemes a fomentar unha oferta tecnolóxica propia de Galicia; atraer talento directivo ás empresas que axude a executar proxectos de innovación; e captar e consolidar aquelas iniciativas que se presentaron a convocatorias europeas ou nacionais que, superando os criterios técnicos de avaliación, non foron seleccionados por esgotamento orzamentario.
Así o explicou a conselleira de Economía e Industria, María Jesús Lorenzana, durante a visita ás instalacións da tecnolóxica Trison. Lorenzana subliñou a aposta da Xunta por que as pequenas e medianas empresas en Galicia incorporen pouco a pouco a tecnoloxía aos seus procesos produtivos.
A conselleira definiu a Trison como unha compañía “ultramoderna” con tecnoloxía “cen por cen galega”, e considerouna como un exemplo do liderado innovador e do talento que alberga o tecido empresarial galego.
Con 19 delegacións propias en 14 países, engadiu, é unha empresa “absolutamente internacionalizada”, con unha carteira media de 5.000 proxectos anuais; o máis recente, a pantalla vertical instalada na torre Entel de Santiago de Chile. Segundo apuntou, traballa, ademais, da man das marcas máis prestixiosas e en sectores que van desde o retail, con Inditex, ata a automoción, o transporte ou o fútbol.
