Lactalis, Capsa, Inleit, Entrepinares… A industria aplica en Galicia o maior recorte aos prezos do leite en España

O Ministerio de Agricultura puxo cifra ao recorte aplicado pola industria láctea na última renovación dos contratos coas granxas galegas, que provocaron protestas e denuncias dos gandeiros a través de organizacións como o Sindicato Labrego Galego ou Unións Agrarias. Galicia levou no mes de abril a maior caída de prezos no conxunto do Estado, converténdose de novo no territorio que máis leite produce, con 202.612 toneladas, e que menos ingresos percibe por cada litro vendido.

A declaración de entregas de leite publicada polo Ministerio para o mes de abril, a primeira que recolle o impacto da renovación á baixa dos contratos, marca un recorte de algo máis de seis céntimos por litro. O prezo medio foi o máis baixo nun ano, ao situarse nos 0,461 euros por litro, fronte aos 0,524 euros do mes de marzo. Entre setembro do ano pasado e marzo de 2026 a industria pagou sempre unha media superior aos 52 céntimos, barreira que se rompeu á baixa coa renovación dos contratos lácteos de primavera.

Ademais, a caída en Galicia foi a máis acusada do conxunto do Estado. Entre as comunidades con maior produción, en Asturias o prezo por litro retrocedeu medio céntimo; en Castela e León baixou 5 céntimos; en Cataluña algo menos de tres céntimos; e Andalucía 3,2 céntimos. O caso asturiano, a terceira comunidade española con máis entregas no mes de abril, vese alterado pola influencia de Central Lechera Asturiana e do seu brazo industrial, Capsa, que paga máis polo leite no seu territorio de orixe que no resto. Esta empresa, que opera a planta de Larsa en Outeiro de Rei, é a segunda que máis leite recolle en Galicia, só por detrás de Lactalis.