Multa millonaria do Goberno ao operador Hatta Energy, que ve en risco a súa viabilidade e as súas inversións en Galicia

Hatta Energy non é un maiorista de produtos petrolíferos calquera. A compañía, que ata outubro de 2022 operaba baixo a denominación social de Trust Company Investment T.R., atópase en pleno desembarco en Galicia, con dous proxectos de biocombustibles anunciados e co traslado da súa sede fiscal a Oleiros, mantendo o seu domicilio social en Madrid, na Torre Picasso. Accidentada é a súa relación coas grandes petrolíferas, e tamén coa Comisión Nacional dos Mercados e a Competencia (CNMC) e mesmo coa Axencia Tributaria. Agora, a compañía ten un novo fronte aberto. E complicado, segundo as súas propias advertencias. Tanto, que compromete a súa viabilidade.

Javier Alonso, CEO de Hatta Energy, e todo o seu equipo, enfrontanse a un novo revés. A sección cuarta da Sala do Contencioso da Audiencia Nacional acaba de dar a razón ao Goberno, concretamente á Vicepresidencia de Sara Aagesen, e denega as medidas cautelares que solicitaba Hatta Energy para librarse dunha multa de 4,5 millóns de euros imposta polo incumprimento da obrigación de manter existencias mínimas de seguridade. A compañía, segundo Transición Ecolóxica, contraviña o artigo 110 da Lei de Hidrocarburos, polo que foi multada por unha infracción considerada grave.

Incumprimento e sanción

O auto denegando as medidas cautelares solicitadas pola compañía, ao que tivo acceso Economía Dixital Galicia, é do pasado 26 de xuño, que daba resposta a un recurso da compañía presentado o 5 de maio. Transición Ecolóxica, agora avalada polo criterio da Audiencia Nacional, que lle dá a razón, considerou a Hatta Energy responsable da comisión dunha infracción grave “como consecuencia do incumprimento da súa obrigación de mantemento de existencias mínimas de seguridade do grupo de destilados medios desde setembro de 2024 a marzo de 2025, ambos incluídos” e impúxolle unha sanción de 4,47 millóns.

A sala non atende aos argumentos da compañía de Alonso, que detallou no seu recurso unha serie de problemas derivados da asunción desa sanción que comprometería a súa viabilidade e tamén as súas inversións en Galicia. Argumentaba o equipo xurídico do maiorista, cos balances achegados no recurso, que “a mera existencia de partidas no activo corrente non permite concluír que a sociedade dispoña de capacidade real para afrontar unha saída extraordinaria e inmediata de fondos como a derivada da sanción impugnada”.

“Tensión crítica de liquidez”

Hatta Energy ía máis alá ao asegurar que “a execución inmediata da sanción suporía a imposibilidade da continuación da actividade mercantil, xa que xunto ás necesidades de tesouraría derivadas do tráfico mercantil ordinario, a entidade soporta unha estrutura de custos operativos fixos que deben atenderse de forma recurrente e ineludible”. Abundaba nisto ao asegurar que “en consecuencia, atendendo aos custos laborais, os gastos estruturais recorrentes, as obrigas tributarias periódicas e a detracción adicional de tesouraría derivada do réxime de anticipos do IVE, Hatta Energy necesita unha tesouraría mensual dispoñible de máis de 150 millóns de euros”.

“A execución inmediata da sanción suporía unha detracción súbita e extraordinaria de tesouraría”, insistía no seu recurso, “rompendo o equilibrio financeiro da compañía e xerando un escenario de tensión crítica de liquidez”. Tamén comprometía a súa capacidade “para acometer e culminar as inversións estratéxicas” en marcha. E aquí entra en xogo Galicia.

Golpe ás inversións

A compañía de Javier Alonso aseguraba no seu recurso que definiu un plan estratéxico de investimento “que pivota, fundamentalmente, sobre o desenvolvemento de dous proxectos industriais de carácter estrutural, como son o proxecto Galicia Biowaste e Proxecto Bio Vigo (biocombustibles a partir do aceite usado), que constitúen activos estratéxicos esenciais, non só desde a perspectiva empresarial, senón tamén en termos de transición enerxética, xeración de emprego cualificado e fortalecemento do tecido industrial”.

“A iso súmase o desenvolvemento progresivo dunha rede de estacións de servizo abandeiradas, cun plan de apertura de 85 establecementos no prazo de cinco anos, o que implica un volume agregado de investimento especialmente significativo”, dicía. A compañía achegou un “informe executivo” dos seus plans de investimento referente á planta de Galicia e á creación da rede de gasolineiras e a presentación do proxecto de Vigo co plan de investimentos, cunha inversión global de 58,8 millóns de euros.

Sen proba suficiente

A sala, no seu auto de rexeitamento das medidas cautelares, e sobre os problemas de liquidez plantexados por Hatta, considera que “non resultaron acreditados mediante proba suficiente, pois se achegaron diversos documentos contables e informes elaborados pola propia sociedade non sendo corroborados por outras probas ou informe pericial algún”.

A compañía presumía no seu recurso da condición de operador ao por maior de produtos petrolíferos, “ocupando en 2024, segundo os datos publicados pola CNMC, como quinto operador do mercado nacional por volume de actividade, e previsiblemente a cuarta posición conforme aos datos do exercicio 2025”, posicionamento que reviste “especial relevancia” por canto constitúe “o único operador independente entre os principais actores do sector que non ostenta a condición de refinador”.