Nace o Instituto de Investigación da universidade privada de Abanca

A Universidade Intercontinental da Empresa anunciou a creación do Instituto Universitario de Investigación (IUI), “un órgano facilitador da actividade investigadora”, cun enfoque de “crecemento progresivo”. Nunha primeira fase, fortaleceranse as investigacións que están en marcha e estenderase e implementarase un plan de desenvolvemento que permita incorporar de maneira gradual novas liñas investigadoras. Desenvolveranse interfacultades e en estreita colaboración co sistema produtivo galego e nacional.

Segundo explican, algunhas investigacións terán tamén alcance internacional, como xa sucede con algúns dos estudos realizados e publicados.

A sede do IUI está en Santiago de Compostela e dependerá funcionalmente do reitor e do seu comité de coordinación académica. Coordinará toda a investigación da universidade a través das súas tres facultades e en colaboración cos centros de investigación aplicada concertados con CTAG, ABANCA Innova, Plexus e HM Hospitais.

En palabras do reitor da UIE, Miguel Ángel Escotet, a produción científica para unha universidade tan nova é “encomiable” e “demostra a paixón e dedicación do profesorado, non só á docencia, senón tamén á investigación, a innovación e o voluntariado ambiental e de sostibilidade, que denotan a súa firme responsabilidade social universitaria”.

Tres anos despois de ter iniciado a súa actividade académica, os profesores da UIE desenvolveron 23 publicacións científicas: 15 en revistas internacionais en inglés, cinco en castelán e tres que se encontran en proceso de verificación.

Así mesmo, o reitor anunciou que “nun futuro inmediato” estableceranse novos centros asociados con Amazon e Microsoft Ibérica, con quen xa se asinaron acordos de colaboración.

A medida que se incorporen novas titulacións de grao, máster e doutoramento, realizaranse novos acordos para a transferencia de coñecemento en ambas direccións.