Monbus volve aportar beneficios millonarios a Abanca, que explora a súa saída do grupo
As empresas participadas polo banco de Juan Carlos Escotet achegaron un resultado positivo de dous millóns, a maior parte xerados polo grupo de transporte de Raúl López.
Raúl López, presidente de Monbus / Foro Empresa Pontevedra
Comentarios
Monbus achegou un resultado positivo de 1,3 millóns á conta de resultados de Abanca no primeiro semestre do ano, cando o banco que preside Juan Carlos Escotet xerou unhas ganancias de 386 millóns, un 9,6% menos. O principal operador galego de transporte de viaxeiros por estrada sitúase como a participada de Abanca con mellores resultados, superando os 787.000 euros achegados ata xuño pola auxiliar da automoción Copo, proveedora de Stellantis.
A entidade financeira abriu a porta o ano pasado a desprenderse do 37% da compañía de Raúl López que ten en carteira, explorando unha posible venda da participación en Transmonbus, o holding de consolidación do grupo de transporte. O movemento buscaría, esencialmente, reducir a exposición do banco en activos non estratéxicos, dos que xa quedan poucos.
Da antiga e enorme corporación industrial das caixas galegas, restan nos balances de Escotet esas dúas participacións en Copo (35,6%) e Monbus, ademais do 20,2% da navieira Elcano, integrada no grupo galego Nosa Terra 21. O informe de resultados semestrais de Abanca remitido á CNMV, con todo, non inclúe o resultado da navieira nos primeiros meses do ano. Isto permite que as participadas, co rei galego dos autocares á cabeza, acheguen un resultado positivo de 2,1 millóns.
Os problemas de Elcano
A candidata a xerar prexuízos á entidade financeira era, precisamente, Elcano, que nos últimos anos xerou importantes perdas e reduciu notablemente o seu volume de negocio. As últimas contas remitidas ao MARF amosaron unhas cifras vermellas de 17 millóns, por riba dos 15,3 millóns de 2024.
A compañía explicaba naquela memoria que a súa actividade se viu afectada polas paradas técnicas de catro dos seus buques: «Estes periodos de paralización repercuten nunha redución dos márgenes e ebitda no exercicio no que se levan a cabo debido a que durante eses períodos os buques que pasan a súa varada non xeran ingresos, pero manteñen os seus custos operativos». Tamén destacaba os problemas en dúas terminais de descarga de Brasil que provocaron atrasos nas operacións de cinco buques, ou o mal comportamento do mercado spot de GNL.
«Os rendementos da flota de GNL volveron diminuír significativamente en 2025, cunha redución arredor do 40% para buques modernos ao spot. O transporte de GNL está baixo presión polo exceso de buques, o que provoca un desaxuste entre oferta e demanda, e acelera a retirada de buques antigos», di Elcano.
