Actualizado
Comentarios
O comité de Ence cifra nun 100% o seguimento da folga e clama contra a Xunta
Un grupo de traballadores e representantes sindicais concentráronse diante do complexo da Xunta en San Caetano para expresar o seu rexeitamento ao ERE que negocia Ence, que contempla 39 saídas en Pontevedra.
Protesta dos traballadores de Ence en Santiago / Europa Press
Comentarios
O comité da fábrica de Ence en Lourizán fai balance da xornada de folga. Un grupo de traballadores e representantes sindicais concentráronse este martes ás portas do complexo administrativo da Xunta en San Caetano para defender que “non sobra ninguén”, fronte ao expediente de regulación de emprego (ERE) que negocia a dirección, que contempla 39 saídas.
Dando lectura a un manifesto, o secretario comarcal de Comisións Obreiras, Omar Vázquez, censurou que o presidente da Xunta, Alfonso Rueda, e a conselleira de Economía, María Jesús Lorenzana, non atenderon á súa petición para manter un encontro ao mesmo tempo que está previsto que este mércores coincida nun foro na capital galega co director territorial de Ence en Galicia, Antonio Casal.
“Nin o desgaste, nin as ameazas, nin a súa enxeñería financeira acabarán con nós. E este conflito tampouco acabará mentres haxa un só compañeiro en xogo sobre a mesa. No noso convenio colectivo non sobra ninguén”, afirmou Vázquez.
Xunto a el, o presidente do comité de Ence, Santiago Cerqueiro, informou de que este mércores celebrarán unha reunión preparatoria, a nivel interno, previa á seguinte cita de negociación do ERE, o xoves 11. En paralelo, Cerqueiro situou no 100% o seguimento da folga na factoría, de 24 horas, ao igual que as anteriores xornadas.
