A pegada de Geriatros en DomusVi: Galicia concentra case un 20% das súas residencias en España

O próximo ano cumpriranse os dez anos do cambio de pel de Geriatros. O xigante galego das residencias de maiores pasou a denominarse DomusVi en outubro de 2017 tras un cambio na súa titularidade mediante o cal a firma consumou a súa despedida da etapa inicial de Caixanova e a posterior de Magnum Capital para saudar a PAI Partners.

O fondo francés tomou o control de Geriatros en 2015 nunha operación valorada en preto de 300 millóns de euros que se produciu apenas un ano despois da adquisición da tamén francesa DomusVi. Tras selar a compra dun terceiro xigante do sector (SARquavitae), PAI Partners decidiu agrupar o negocio destas tres empresas baixo unha mesma marca (DomusVi) que, a pesar de todo, segue dando pistas das súas orixes.

O peso de Galicia en DomusVi

Non en balde, Galicia concentra 29 dos 155 centros asistenciais que DomusVi desprega en España. Así se desprende da última memoria anual do grupo, que revela que ao peche de 2025 contaba con 28 centros residenciais e un centro de día na comunidade de orixe de Geriatros.

Esta cifra representa un 18,7% do total de España, onde atendeu a 30.000 persoas en residencias e centros de día, así como a outras 124.500 no seu propio contorno domiciliario a través das súas oficinas de servizo de atención no domicilio e oficinas de teleasistencia.

DomusVi conta con dúas delegacións destas últimas nas cidades de Vigo e Ourense, o que converte a Galicia na súa comunidade estrela en territorio español. E é que esta rede de 29 centros asistenciais e dúas oficinas supera os 18 centros e 9 oficinas da Comunidade de Madrid ou os 16 centros e catro oficinas de Andalucía.

A firma está presente en sete países (España, Francia, Alemaña, Portugal, Irlanda, Holanda e Chile) e sumaba un total de 575 residencias e unhas 51.194 camas ao remate de 2025. Deste total, 20.040 (un 39,1% do total) están ubicadas en España, que se erixe como o segundo maior mercado da compañía tras Francia.

Primeira ausencia galega á fronte de DomusVi España

A compañía que preside Sylvain Rabuel tamén ten en España a 26.900 dos seus algo máis de 55.000 traballadores en todo o mundo. Para xestionar este negocio no país, a compañía optou por vez primeira por poñer á fronte a unha executiva allea a Galicia. Trátase de Marilyne Mesiano, que exerce como conselleira delegada de DomusVi en España desde o pasado mes de marzo.

A executiva francesa tomou o relevo de José María Pena, que abandonou o cargo tras máis de catro anos e medio para facerse co bastón de mando de Valoriza Servicios Medioambientales, antiga filial de Sacyr que desde o ano 2023 está en mans de Morgan Stanley.

Pena fora o encargado de coller o timón de DomusVi tras o cesamento de Josefina Fernández, histórica cofundadora de Geriatros, que abandonou o posto en 2021 en medio da polémica pola xestión dos casos de Covid-19 para embarcarse nunha etapa como presidenta institucional á que poría fin en 2023.

«É un honor asumir a dirección de DomusVi España. Tras ter traballado xa cos equipos en España, coñezo a súa profesionalidade, o seu compromiso e a calidade do traballo que realizan. Teño moitas ganas de seguir construíndo sobre este impulso e de acompañar aos equipos nesta nova etapa de desenvolvemento compartido», apuntaba Mesiano tras o seu nomeamento.