Pharma Mar únese a Globant para acelerar a investigación oncolóxica con intelixencia artificial

Pharma Mar, biotecnolóxica de orixe galega capitaneada por José María Fernández de Sousa, e Globant pecharon unha alianza para acelerar o descubrimento de medicamentos contra o cancro mediante un sistema de intelixencia artificial multiaxente.

As entidades crearon ‘Globant Enterprise AI‘, que ofrece máis do 90% de precisión na recuperación de datos complexos e reduce o tempo necesario para obter información clave ata 15 veces, axudando aos científicos a seleccionar candidatos a fármacos con alto potencial para o seu desenvolvemento clínico nunha fracción do tempo que se requiría anteriormente.

Esta nova plataforma é capaz de analizar grandes volumes de fontes de datos científicos, regulatorios e clínicos para apoiar a toma de decisións en todo o ecosistema de I+D de PharmaMar e permitir fluxos de traballo continuos e de autoaprendizaxe.

Deste xeito, máis de 20 axentes dixitais especializados traballan nas áreas preclínica, clínica, regulatoria, comercial e estratéxica, unindo a creatividade humana e a precisión das máquinas na loita contra o cancro. Cada axente colabora dentro da arquitectura segura de GEAI para procesar documentos, simular escenarios e clasificar os activos farmacéuticos máis prometedores.

Así mesmo, este sistema intelixente integra información de bases de datos internas, publicacións científicas e fontes regulatorias globais como a Administración de Alimentos e Medicamentos dos Estados Unidos (FDA, polas súas siglas en inglés) e a Axencia do Medicamento Europea (EMA, polas súas siglas en inglés), o que permite aos equipos de PharmaMar identificar combinacións de tratamento prometedoras e tomar decisións máis informadas e rápidas.

“O descubrimento de fármacos sempre foi unha carreira contrarreloxo, e en oncología ese tempo pode significar todo. Ao integrar as tecnoloxías de IA de Globant, podemos procesar datos de miles de documentos en segundos, simular escenarios e centrar os nosos esforzos de investigación alí onde teñen o maior potencial para marcar unha diferenza para os pacientes”, sinalou o chief medical officer de PharmaMar, Javier Jiménez.

Desde PharmaMar destacaron que, máis aló da velocidade e a eficiencia, a colaboración reforza a súa capacidade para reutilizar o coñecemento institucional e fomenta unha nova cultura de innovación dixital nos seus equipos. Na próxima fase do proxecto, PharmaMar prevé ampliar estas capacidades para permitir a xeración de hipóteses, verificacións de cumprimento normativo en tempo real e a creación automatizada de contidos para informes científicos.

“A visión de PharmaMar demostra o que é posible cando a intelixencia humana e os sistemas de IA traballan cóbado con cóbado. Ao aproveitar a IA axéntica, estamos construíndo un novo modelo para o descubrimento de fármacos; un que aporta precisión e escalabilidade a un campo que impacta directamente en millóns de vidas”, rematou o CEO do Healthcare and Life Sciences AI Studio de Globant, Ariel Capone.