RBC valora Inditex en case 200.000 millóns e recomenda mercar aproveitando a crise de Ormuz
O banco canadense cre que a multinacional de Amancio Ortega terá unhas vendas "fortes" neste primeiro semestre e beneficiarse-á da súa flexibilidade operativa e do control de custos.
Fotomontaxe de Óscar García Maceiras e Marta Ortega co interior do edificio da bolsa de Madrid de fondo. Fotos: Europa Press
Comentarios
Nos últimos 15 días, as accións de Inditex depreciáronse un 4,5% en bolsa e RBC chama a aproveitar a oportunidade. O banco canadense vincula o retroceso en bolsa do xigante téxtil, cunha capitalización actual de 166.500 millóns, coa preocupación por unha ralentización das vendas e á “renovada incerteza en Oriente Medio“, que pode provocar un novo encarecemento do petróleo. Con todo, os analistas da firma non cren que isto teña un impacto especial na marcha do grupo de Amancio Ortega e prevén unhas vendas “fortes” no primeiro semestre do exercicio, que pecha este xullo.
RBC cre que a diversificación xeográfica e a flexibilidade operativa da compañía lle permitirá dar continuidade ao seu crecemento nun mercado da moda fragmentado. “Consideramos que esta é unha oportunidade de compra”, conclúe nunha nota publicada este luns. Tamén pon en valor o control de custos de Inditex, que o fai resiliente fronte ao encarecemento das materias primas ou das tarifas de transporte. Pon como exemplo os contratos a longo prazo cos seus provedores de enerxía ou transportistas de última milla. Neste sentido, subliña que noutros períodos de encarecemento de prezos, o impacto no balance do grupo que preside Marta Ortega foi insignificante.
Por último, considera que a recente depreciación do euro fronte ao dólar estadounidense e outras divisas beneficiará os ingresos, obtendo un menor impacto negativo polo tipo de cambio.
Canto vale Inditex?
RBC revisa ao alza as estimacións do beneficio neto de Inditex, o que vincula a novas aperturas das cadeas distintas de Zara, pois o grupo anunciou novos establecementos de Bershka e Massimo Dutti en Estados Unidos, ou a expansión de Lefties en Reino Unido e Francia, por exemplo. Mantén o prezo obxectivo do grupo nos 63 euros, o que supón valorar a compañía en 196.350 millóns, 30.000 millóns máis que a súa capitalización actual. Estima o potencial de revalorización dos títulos, que cotizan a 53,44 euros, nun 20%.
A multinacional galega é actualmente a segunda maior cotizada española por valor en bolsa, só por detrás do Santander, que consumou este ano o sorpasso cun valor no IBEX de 172.600 millóns, case 50.000 millóns máis que o segundo banco do selectivo, BBVA.
