Reganosa consolida o seu negocio internacional con novos contratos en Polonia, Irlanda e Alemaña
A compañía reforza o seu papel como proveedora no sector enerxético europeo, onde tamén ten presenza en Malta e Italia.
Terminal de GNL de Gdansk Polonia – Reganosa
Comentarios
Reganosa segue reforzando a súa presenza internacional da man dalgúns dos principais operadores públicos do sector gasista europeo. A compañía traballa actualmente con GAZ-SYSTEM, en Polonia; Gas Networks Ireland (GNI), en Irlanda; e Deutsche Energy Terminal (DET), en Alemaña, entidades responsables de infraestruturas estratéxicas para garantir o subministro enerxético nos seus respectivos países.
En Polonia, a compañía resultou adxudicataria dun contrato marco con GAZ-SYSTEM, operador do sistema gasista nacional, para a prestación de servizos de consultoría comercial e operativa vinculados á nova terminal de GNL de Gdańsk. “Este proxecto constitúe unha das principais apostas estratéxicas do país para reforzar a seguridade de subministro e consolidarse como hub gasista en Europa Central e do Leste, nun contexto de diversificación de fontes de enerxía e redución da dependencia externa”, explican desde a compañía.
O contrato inclúe o apoio na preparación operativa da terminal, a asistencia relacionada coas fases de posta en marcha e operación inicial, así como a asistencia en procesos de contratación.
Contratos en Irlanda e Alemaña
No caso de Irlanda, Reganosa foi elixida nun proceso de licitación internacional por Gas Networks Ireland, operador semipúblico da rede de gas, para a prestación de servizos de verificación técnica independente para o deseño da enxeñaría inicial (FEED) do proxecto Strategic Gas Emergency Reserve (SGER). A iniciativa “ten como obxectivo reforzar a resiliencia do sistema enerxético do país, dada a súa elevada dependencia de importacións e a ausencia de almacenamento estratéxico propio”.
O proxecto consiste no desenvolvemento dunha reserva “estratéxica” de gas con fins non comerciais baseada nunha unidade flotante de almacenamento e regasificación (FSRU) e a infraestrutura asociada, que actuará como respaldo en situacións de emerxencia, contribuíndo a garantir a continuidade do subministro.
Por outra banda, en Alemaña, a compañía destaca a súa posición “consolidada” como provedor de servizos de infraestrutura enerxética a longo prazo. A compañía presta servizos de operación e mantemento na terminal de GNL de Brunsbüttel desde 2022. “Esta evolución reflicte non só a continuidade da relación cun cliente estatal como Deutsche Energy Terminal (DET), senón tamén a confianza depositada en Reganosa para asumir tarefas e responsabilidades de amplo alcance no ámbito dos servizos fiables de explotación e mantemento de infraestruturas críticas”.
Socio de “longo percorrido”
A compañía pon en valor que a súa participación en distintas fases destes proxectos reforza “a súa proposta de valor integral e o seu posicionamento como socio de longo percorrido no desenvolvemento de infraestruturas enerxéticas”.
“A consolidación de Reganosa en mercados como Polonia, Irlanda e Alemaña constitúe un reflexo da súa capacidade para competir con éxito no ámbito internacional e para achegar coñecemento especializado no desenvolvemento, optimización e operación de infraestruturas de GNL, contribuíndo de forma activa ao reforzo da seguridade enerxética e á transformación do modelo enerxético en Europa. Esta proxección internacional súmase a unha presenza xa consolidada noutras infraestruturas estratéxicas do continente: a compañía está presente na terminal de Delimara (Malta) e na terminal de Oristano (Italia), é propietaria e operadora da Terminal de Enerxía de Mugardos (Galicia, España), e conta cunha participación do 25 % en Musel E-Hub (Asturias, España)”.
