Stolt Sea Farm recibe o visto bo da Xunta para comezar a levantar a súa nova planta en Rianxo

A Xunta autorizou no Consello celebrado este luns a execución das obras da primeira fase da planta de adaptación para a primeira venda e envasado de peixes planos (rodaballo e lenguado) impulsada por Stolt Sea Farm no polígono industrial de Rianxo, que comezarán nas próximas semanas. O proxecto, declarado estratéxico en xaneiro do ano pasado, suporá un investimento de 44,8 millóns e a creación de 100 postos de traballo directos, que serán 173 unha vez finalizada a segunda fase.

A execución desta primeira fase inclúe unha planta que contará cunha superficie de máis de 21.200 metros cadrados e permitirá ampliar a capacidade de procesamento e envasado que actualmente está centralizada na planta de Carnota. Tamén se automatizará o procesamento do rodaballo e lenguado fresco que se engorda nas granxas da compañía, o que achegará “un maior valor aos produtos de acuicultura e un mellor aliñamento coa demanda dos consumidores”.

O proxecto incorporará equipos da máis alta tecnoloxía e eficiencia enerxética e produtiva, e, ademais, contará cunha planta de I+D+i no seu interior, que profundizará na colaboración existente con centros tecnolóxicos e outros axentes relevantes no ámbito da investigación. “Con esta actuación, preténdese responder á demanda de novos formatos de comercialización, implementando ao mesmo tempo un modelo de integración vertical co resto das súas plantas”, explican desde a Xunta.

Stolt Sea Farm é unha gran empresa líder en acuicultura terrestre de alta tecnoloxía, principal provedor de rodaballo e lenguado, que exporta arredor do 60% da súa produción. Ten unha capacidade de produción anual de 6.500 toneladas de rodaballo e 1.700 toneladas de lenguado.