Taboada e Ramos, a discreta construtora galega que medra un 16% e supera os 65 millóns en ingresos

Taboada e Ramos, unha das grandes adxudicatarias de obra pública en Galicia, aumentou en 2025 a súa cifra de negocios un 16%. A construtora con base de operacións en Lalín pechou o exercicio cunha facturación de 65,54 millóns, nove por encima do rexistrado un ano antes.

Segundo os datos depositados no Rexistro Mercantil, consultados por Economía Dixital Galicia a través da plataforma Insight View, o resultado de explotación (beneficio operativo) da compañía, rebatizada hai uns catro anos como Grupo Taboram, retrocedeu un 12% ao pasar dos 9 millóns aos 7,94, mentres que o beneficio alcanzou os 8 millóns, un menos que o ano anterior.

A construtora manexa uns activos de 173 millóns, 35 máis que en 2024. Pola súa parte, o patrimonio neto incrementouse un 30% tras pasar dos 94 millóns aos 122,35. Ao final do exercicio o grupo contaba cunha tesouraría de máis de 33 millóns e un fondo de manobra positivo de case 88 millóns.

“Estímase que as vendas para o exercicio 2026 teñan un aumento respecto ás de 2025 cun maior marxe positivo de explotación debido á finalización e venda dalgúns dos proxectos inmobiliarios antes referenciados”. 

Reestruturación de Taboada e Ramos

En 2020 Taboada e Ramos realizou unha reestruturación do grupo co obxectivo de “mellorar a xestión operativa das actividades”. Deste xeito, procedeuuse a segregar e traspasar parte da actividade empresarial da sociedade Construcións Taboada e Ramos (agora, Grupo Taboram) relacionada coa execución e conservación de obra civil (pública e privada) e a construción e mantemento de edificacións e instalacións, á filial Construcións e Obras Taboada Ramos SL.

“Tras o proceso de segregación, as súas actividades principais pasan a ser as dunha sociedade holding activa, dirixindo e xestionando activamente as súas accións e participacións, prestando ás sociedades do grupo empresarial todos os servizos de dirección, así como a financiación das empresas participadas”. 

Proxectos do grupo

O grupo destaca na memoria que acompaña ás contas a evolución dos proxectos da división inmobiliaria en A Coruña, Sanxenxo e Vidan. Respecto ao proxecto inmobiliario do Parque Eiris da cidade herculina, a compañía conseguiu en maio de 2024 –despois de anos de paralización– a licenza de acordo co plan urbanístico para a construción de 38 vivendas e trasteiros e garaxe. En outubro dese mesmo ano comezaron as obras e prevese que a entrega se realice en 2027.

O pasado exercicio a compañía finalizou a construción de catro vivendas unifamiliares en Nanín (Sanxenxo), cun custo de execución de case 1,3 millóns. Ese mesmo ano “tamén se produciron avances” no proxecto “Muiño de Vidán”, entre a estrada de Noia e o río Sarela, destinado a un uso residencial e complementarios cuxo custo de execución ascendería aos 6,4 millóns.

Esta iniciativa contempla a construción dun edificio de 4 bloques de vivenda e hotel apartamento, con usos comerciais na planta baixa, e doce vivendas unifamiliares pareadas. “O proxecto de urbanización foi presentado ante o Concello de Santiago e, nestes momentos, atópase en fase de tramitación administrativa pendente da súa aprobación, a cal se prevé que teña lugar nun breve prazo”. 

Unha das últimas apostas da empresa foi a do sector enerxético, coa xeración e explotación fotovoltaica e eólica. A compañía destaca os proxectos para o desenvolvemento dos parques eólicos de Valdepereira e Pico Seco, de 24 e 27 megavatios de potencia instalada, respectivamente, que se van a situar nos concellos de Lalín e O Irixo, promovidos a través da sociedade participada Aeroxeración Galicia, S.L.

Para 2026 o grupo prevé “un avance significativo na marcha dos proxectos inmobiliarios e eólicos”.