Unións Agrarias cifra en máis de 600 millóns as reclamacións contra o ‘cártel do leite’
As indemnizacións recoñecidas aos gandeiros nos xulgados oscilan entre o 2% e o 9,4% do prezo ao que venderon o leite; o despacho Eskariam impulsa unhas 6.000 demandas dos produtores contra a industria.
Protesta dos gandeiros fronte a unha fábrica de Lactalis polos baixos prezos que perciben pola leite / EP/Álex Cámara
Comentarios
A Comisión Nacional dos Mercados e a Competencia impuxo 80,6 millóns en multas en 2019 a oito empresas e dúas patronais por intercambiar información sensible sobre a compra de leite cru nas granxas. No chamado cártel do leite están implicadas as principais compañías do sector, como Capsa, Lactalis, Nestlé, Pascual ou Danone, e a súa evolución xudicial ten actualmente dous frontes. Por unha banda, o Supremo está resolvendo a cantidade das sancións, recorridas pola industria e que, na súa maior parte, xa foron ratificadas pola Audiencia Nacional. Ata o de agora, só Nestlé ten xa unha condena definitiva do Alto Tribunal, que a obrigou a aboar 6,86 millóns. Por outra, os gandeiros afectados polo cártel presentaron miles de demandas para conseguir unha indemnización polo teórico menor prezo que recibiron polo seu leite, ao vender nun mercado cartelizado.
Sobre esta segunda dimensión, que ameaza con ser máis lesiva para as compañías que as sancións de Competencia, reflexionou Unións Agrarias, que nunha rolda de prensa celebrada o pasado venres desgranou as cifras clave sobre o volume de reclamacións presentadas e o número de gandeiros afectados pola actividade colusoria. Segundo a organización, só en Galicia hai uns 35.000 produtores con dereito a reclamar, máis da metade dos 56.000 afectados en España.
Os cálculos da entidade cifran en máis de 600 millóns a cantidade das compensacións reclamadas xudicialmente á industria, só contando os casos que leva directamente Unións Agrarias en colaboración co despacho de avogados Eskariam, que está impulsando unhas 6.000 demandas.
Indemnizacións entre o 2 e o 9,4%
A organización deu conta de varias resolucións favorables ás granxas emitidas polos xulgados de Barcelona, Madrid, Granada e Toledo, nas que se ratifica que non hai prescrición dos feitos, así como o delito xa sancionado pola CNMC. O importe das indemnizacións recoñecidas aos produtores é moi variable nestas sentenzas, oscilando entre o 2% do prezo de venda do leite durante o período sancionado, e o 9,4%. Todo fai indicar que será o Tribunal Supremo quen acabe fixando a indemnización definitiva en todos os casos, pois tanto a industria como os produtores están recorrendo os fallos desfavorables, e ambas partes exhiben peritaxes para lograr unha compensación que lles favoreza.
Unións Agrarias lembrou que os gandeiros teñen dereito a reclamar independentemente de que venderan o seu leite ou non ás empresas sancionadas debido ao efecto paraugas. Isto quere dicir que a influencia do cártel, pola cota de mercado dos seus integrantes e a súa duración, tería trascendido aos seus propios membros e tería condicionado os prezos de todo o mercado de abastecemento de leite na orixe. Isto implicaría que gandeiros que subministrasen a empresas distintas das sancionadas tamén terían recibido un menor prezo e terían dereito a reclamar contra o cártel.
