BBVA suma 2.200 empresas en Galicia no primeiro trimestre

BBVA crece no sector empresarial galego. Así se puxo de manifesto no Consello Asesor Rexional da Dirección Territorial Noroeste de BBVA en España, que se reuniu no marco dos encontros periódicos que mantén para analizar a evolución do entorno económico e os principais retos do tecido empresarial. Durante a xornada expuxéronse as cifras de peche do primeiro trimestre do ano, no que o banco prestaba servizo a 2.200 novas empresas galegas.

Á xornada asistiron o director de Empresas e Institucións de BBVA en España, José García Casteleiro; a directora Territorial Noroeste de BBVA, Guadalupe Hernández; e a directora rexional BEI Noroeste, Begoña Cuetos. Tamén participaron o responsable de análise económica de BBVA Research, Rafael Doménech; o director do segmento de Alto Valor de BBVA España, Fernando Ruíz e o director de Sostibilidade de BBVA en España, Ángel Giménez Palazón.

Financiamento a empresas

Durante o foro abordouse a evolución do contexto económico nun entorno marcado polos cambios xeopolíticos, así como a xestión estratéxica do patrimonio familiar e empresarial e as oportunidades e retos para as empresas no entorno actual do mercado eléctrico. O responsable de análise económica de BBVA Research, Rafael Doménech, analizou a situación e perspectivas da economía española e da comunidade, subliñando que o Produto Interior Bruto (PIB) de Galicia medrará un 2,3% en 2026, pero que se elevará ata o 2,7% en 2027, segundo as súas previsións.

Nun comunicado, BBVA asegura que mantén en Galicia unha relación estreita con pemes, empresas familiares e compañías de maior dimensión, ás que acompaña con solucións de financiamento, servizos transaccionais, asesoramento especializado e capacidades dixitais. No primeiro trimestre do ano, BBVA achegou 723 millóns de euros de novo financiamento ao tecido empresarial galego, o que supón un 7,7% máis que no mesmo período do ano anterior.