Besteiro envía unha carta á militancia polo caso Tomé e lembra que o PSdeG non ten acceso a denuncias.

O líder do PSdeG, José Ramón Gómez Besteiro, enviou na tarde deste xoves unha carta á militancia na que detalla as decisións adoptadas polo partido tras transcender as denuncias por acoso contra o que era presidente da Deputación de Lugo e secretario xeral dos socialistas na provincia, José Tomé. O secretario xeral informa de que o partido en Galicia non ten acceso a estas denuncias.

No texto, enviado polo PSdeG aos medios, Besteiro asegura que as informacións publicadas nas últimas horas sobre o presunto acoso na provincia de Lugo causaron a todos os socialistas unha “profunda tristeza, unha indignación profunda e unha repugnancia inevitable“.

“Non miramos para outro lado”

“Sabedes que no noso partido nunca miramos para outro lado. Por iso, xa están activados todos os mecanismos internos para investigar con rigor e chegar ata o final, como sempre fixemos”, sostén nun texto no que destaca que, “como organización feminista, comprometida e valente”, a primeira palabra do PSdeG “é para as vítimas”.

“Queremos que saiban –e quero dicírvolo tamén a vós– que teñen o noso afecto, o noso respaldo e a nosa solidariedade. No Partido Socialista, defender ás mulleres fronte a calquera forma de violencia non é unha consigna: é unha convicción que nos define. Caia quen caia. Sen excepcións. Sen fisuras. Tolerancia cero”, subliña.

Esixe a entrega das actas

Besteiro lembra aos militantes que, desde a xornada do mércores, José Tomé xa non forma parte do Partido Socialista tras solicitar a súa suspensión de militancia e anunciar a súa dimisión como presidente da Deputación de Lugo e o abandono de todos os grupos socialistas.

“Era o que debía facer. Era o que tiña que facer. E tamén o que lle esiximos neste partido, xunto á entrega das actas”. “O PSdeG non entende a exemplaridade como xesto retórico, senón como unha obriga ética”, apunta.

Sen acceso á denuncia no PSdeG

Neste punto, o xefe de filas do PSdeG subliña algo que cualifica de “moi importante” e é que a formación en Galicia “non ten acceso a ningunha denuncia presentada a través do canal específico do partido contra o acoso” toda vez que, segundo sinala, “o protocolo garante o anonimato absoluto”.

“Ese mesmo anonimato”, apunta, “é o que permite que as mulleres se sintan seguras para dar o paso de denunciar, respectando os seus tempos e, sobre todo, o seu dereito”. Por iso, pide respecto para quen sufrise estes feitos e confianza no traballo do Órgano contra o Acoso, que asegura que actuará con independencia e garantías totais.

“Nesta organización aprendemos que só defendendo sen medo a dignidade das mulleres estaremos á altura da nosa historia”, indica a carta, na que Besteiro sostén que “é tamén nestes momentos difíciles cando un partido se retrata”.

“Hoxe, igual que onte e como será sempre, estaremos ao lado das vítimas e animaremos a denunciar calquera conduta machista, veña de quen veña. Como sempre fixemos”, traslada.

O xefe de filas do PSdeG tamén detalla que, “por responsabilidade e para garantir a estabilidade orgánica”, o PSdeG proporá á Executiva Federal o nomeamento inmediato dunha Comisión Xestora na provincia de Lugo.

Comparecencia pública

Ademais, informa de que na xornada do venres reunirase a dirección do partido en Galicia para abordar esta situación tras horas de “intenso traballo” e que, ao seu término, fará as correspondentes declaracións públicas.

Esta será a súa primeira comparecencia en rolda de prensa desde que detonou o caso, toda vez que, segundo trasladaron fontes do PSdeG, cancelou a súa axenda pública para centrarse en abordar a crise interna.

Besteiro finaliza a carta á militancia trasladando que “non son días fáciles” pero que tamén son xornadas nas que poden “sentir orgullo” dun partido que “non calla, non se esconde e non se amedrenta”. “Defendemos a igualdade porque é a razón mesma da nosa existencia. Porque é o que somos. Grazas polo voso compromiso, pola vosa confianza e pola vosa militancia”, traslada.