O Goberno concede a Zaragoza a Axencia de Saúde Pública pola que puñaba Lugo
Lugo, Toledo, Granada, Murcia, Barcelona, León e Oviedo tamén presentaran a súa candidatura para acoller a sede desta institución na que traballarán unhas 300 persoas.
O presidente do Goberno, Pedro Sánchez, durante a súa comparecencia institucional en La Moncloa, na que comunicou que decidiu seguir á fronte do Executivo, EFE/Moncloa/Borja Puig de la Bellacasa.
Comentarios
Varapalo ás aspiracións da cidade de Lugo para acoller a Axencia Estatal de Saúde Pública. O presidente do Goberno, Pedro Sánchez, anunciou este martes que Zaragoza será a sede desta institución en virtude do acordo acadado para iso na última reunión do Consello de Ministros neste período de sesións.
“Noraboa aos zaragozanos e zaragozanas, e noraboa tamén ao conxunto do país”, ofrecía o líder do Executivo durante a súa comparecencia para efectuar balance do curso político. “Fai falla ter unha Axencia Estatal de Saúde Pública que nos permita ter todos os recursos que non tivemos durante os primeiros meses aciagos da pandemia”, subliñou.
Toledo (Castela-A Mancha), Granada (Andalucía), Zaragoza (Aragón), Murcia, Barcelona (Cataluña), León (Castela e León), Oviedo (Asturias) e Lugo (Galicia) eran as oito cidades que aspiraban a acoller a sede deste organismo.
O Goberno de Miguel Fernández (PSdeG) acordou meses antes da moción de censura que supuxo o seu relevo por Elena Candia (PP) a designación do Pazo de Feiras e Congresos como hipotética sede da Axencia Estatal de Saúde Pública. O Concello de Lugo poñía á súa disposición un recinto dotado de 27.000 metros cadrados de superficie, dous pavillóns diáfanos, áreas de traballo e reunión, centro de negocios, oficinas, salas polivalentes e servizos complementarios, ademais dun salón de actos con capacidade para máis de 500 persoas, espazos para formación e comunicación, accesos cómodos, amplo aparcadoiro e unha localización estratéxica ao carón do río Miño.
As estimacións apuntaban a que a captación desta sede se traduciría na creación de uns 300 postos de traballo cualificado e que xeraría «actividade económica inducida, atraer talento e consolidar a cidade como un referente en saúde pública, investigación e innovación en Galicia».
