Lugo dá o paso e presenta a súa candidatura para acoller a Axencia Estatal de Saúde Pública.
O alcalde de Lugo solicitará a inclusión do Pazo de Feiras e Congresos como sede da Axencia Estatal de Saúde Pública e reclama o apoio da Xunta.
O alcalde de Lugo, Miguel Fernández / Europa Press
Comentarios
Lugo move ficha. O alcalde da cidade da Muralla, Miguel Fernández, solicitará ao Patronato da Fundación Feiras e Exposicións de Lugo a inclusión do Pazo de Feiras e Congresos como sede proposta dentro da candidatura da cidade para acoller a Agencia Estatal de Saúde Pública (AESAP).
O Goberno local presenta, desta maneira, as liñas mestras dunha candidatura para a que demandou formalmente o apoio do Consello da Xunta, tal e como recollen as bases oficiais para a designación da sede. Trátase dunha iniciativa coa que o Concello de Lugo busca “reafirmar a súa lideranza” no proceso e co obxectivo de “construír unha candidatura solvente, rigorosa e aliñada cos criterios técnicos esixidos”.
“Estamos ante un proceso moi competitivo no que Lugo debe presentar a súa mellor versión, sumando esforzos, xerando consensos e construíndo unha candidatura sólida e compartida por todas as institucións”, sinalou Miguel Fernández.
As fortalezas da candidatura
A través dunha nota de prensa, o Concello explica que o Pazo de Feiras e Congresos de Lugo reúne condicións “especialmente acomodadas” para albergar a sede da Agencia, tanto pola súa dimensión e versatilidade como pola dispoñibilidade inmediata dos espazos.
Trátase dun recinto que conta cunha superficie total de 27.000 metros cadrados, dous pavillóns diáfanos, áreas de traballo e reunión, centro de negocios, oficinas, salas polivalentes e servizos complementarios, ademais dun salón de actos con capacidade para máis de 500 persoas, espazos para formación e comunicación, accesos cómodos, amplo aparcamento e unha localización estratéxica ao lado do río Miño.
Con todo, o alcalde tamén subliñou o impacto transformador que tería para Lugo a localización da Agencia Estatal de Saúde Pública, un organismo que poderá chegar a contar con arredor de 300 postos de traballo cualificado, ademais de xerar “actividade económica inducida, atraer talento e consolidar a cidade como un referente en saúde pública, investigación e innovación en Galicia”.
