A tecnoloxía de GenesisCare impulsa unha nova xeración de tratamentos para o cancro

A filial española de GenesisCare, compañía de atención oncolóxica con presenza en España, Australia e Reino Unido, levará os primeiros resultados clínicos do uso de radioterapia adaptativa guiada por resonancia magnética (RM) en pacientes con cancro de próstata ao Congreso Nacional da Sociedade Española de Oncoloxía Radioterápica (SEOR), que se celebrará en Alacante do 3 ao 5 de xuño. 

“As investigacións avalan a seguridade e o potencial da radioterapia adaptativa guiada por RM para converterse nun novo estándar terapéutico para tratar pacientes nos que o tumor está localizado e non require cirurxía, e naqueles nos que recidivou a enfermidade sen metástases, tras a extirpación total da próstata (prostatectomía)”, explican desde a compañía.

Estas conclusións aparecen reflectidas nos dous primeiros estudos prospectivos realizados en España con pacientes tratados coa tecnoloxía MR-Linac MRidian®, “unha das máis avanzadas e precisas no campo da oncoloxía radioterápica”. Este novo sistema combina resonancia magnética e radioterapia e permite personalizar o tratamento en tempo real en cada sesión ao ofrecer imaxes de alta calidade tanto do tumor como dos órganos próximos. “Deste xeito, consegue concentrar, con alta precisión e seguridade, a radiación no tumor, limitando o dano en tecidos sans e protexendo órganos como a vexiga e o recto para diminuír os principais efectos secundarios do tratamento como a incontinencia urinaria e a disfunción eréctil”.

Ademais dos beneficios terapéuticos, a compañía destaca que a aplicación desta radioterapia “ten un impacto real na vida dos pacientes” ao simplificar o proceso e reducir os días de tratamento, que se completa en 5 sesións, fronte ás 25-33 do esquema estándar. 

Os estudos de GenesisCare

GenesisCare avaliou o tratamento con tecnoloxía MR-Linac MRidian® sobre o leito prostático de 34 pacientes con recaída bioquímica poscirúrxica, é dicir, naqueles nos que recidivou a enfermidade tras a cirurxía. Por outra banda, tamén analizou a viabilidade e seguridade do uso desta tecnoloxía en 100 pacientes diagnosticados con cancro de próstata localizado con risco baixo, intermedio e alto, que non foron sometidos a cirurxía.  

En ambos ensaios clínicos, desenvolvidos entre 2023 e 2025, os resultados preliminares confirman unha boa tolerancia dos pacientes ao tratamento, sen efectos adversos clínicamente significativos e cun impacto reducido sobre a función urinaria, intestinal e sexual.

“A radioterapia adaptativa permítenos ofrecer tratamentos oncolóxicos máis personalizados, precisos e menos invasivos, co obxectivo de reducir os efectos adversos e preservar a calidade de vida dos pacientes. Aínda que é necesario seguir xerando evidencia científica e datos a longo prazo, os estudos publicados ata a data mostran resultados moi prometedores en termos de tolerancia, precisión terapéutica e control do tratamento. Ademais, esta tecnoloxía achega unha maior fiabilidade na toma de decisións clínicas e mellora a eficiencia dos procesos asistenciais de alta complexidade”, sinala Felipe Couñago, director médico de GenesisCare.

Máis de 40 achegas científicas

A compañía presentará no marco do XXIII Congreso Nacional da Sociedade Española de Oncoloxía Radioterápica (SEOR) máis de 40 achegas científicas. Entre elas, e ademais dos dous estudos de cancro de próstata sinalados, GenesisCare avanzará os resultados dun novo estudo sobre a aplicación de radioterapia adaptativa en determinados pacientes con cancro de páncreas. 

En concreto, achegará novos datos sobre o uso desta tecnoloxía en tumores pancreáticos localmente avanzados non operables, considerados entre os de peor prognóstico e con maiores necesidades terapéuticas non cubertas. “O estudo, publicado na revista Biomedicines, representa unha das primeiras evidencias clínicas en España sobre o uso de radioterapia adaptativa guiada por resonancia en cancro de páncreas e demostra un elevado control local da enfermidade (89,3%) e unha boa tolerancia dos pacientes ao tratamento”.

Durante o Congreso da SEOR, GenesisCare organizará tamén o simposio “Transformando a Radioterapia Adaptativa”, moderado polos oncólogos radioterápicos Felipe Couñago, director médico de GenesisCare España, e Fernando López Campos, facultativo de GenesisCare Madrid e do Hospital Universitario Ramón y Cajal da Comunidade de Madrid. 

O encontro contará coa participación de tres referentes internacionais en radioterapia adaptativa, que compartirán a súa experiencia e visión sobre os avances máis recentes neste campo. Así mesmo, presentarase un resumo dos resultados clínicos obtidos por GenesisCare desde a posta en marcha do tratamento coa tecnoloxía MRIdian, destacando o seu impacto na práctica clínica e na atención aos pacientes.