A proposta de financiamento autonómico non convence aos expertos: “Necesita moitos axustes”
O peche das xornadas Rifde, celebradas na Facultade de Ciencias Económicas e Empresariais da USC, analizou, entre outros aspectos, o “mecanismo de nivelación, que é unha decisión política e será clave para definir a distribución de recursos entre as comunidades autónomas”.
Foto de familia do peche das xornadas Rifde celebradas na Facultade de Ciencias Económicas e Empresariais da USC
Comentarios
Académicos e expertos que participaron na última sesión das xornadas Rifde, celebradas na Facultade de Ciencias Económicas e Empresariais da Universidade de Santiago de Compostela, consideran que a última proposta de financiamento autonómico “serve como punto de partida para as negociacións, pero require moitos axustes para que conte co respaldo da maioría”.
Na clausura das xornadas, celebrada este mércores, os académicos presentes centraronse, entre outros aspectos, no “mecanismo de nivelación, que é unha decisión política e será clave para definir a distribución de recursos entre as comunidades autónomas”.
Tamén se destacou a necesidade de seguir impulsando “espazos de diálogo académico e institucional que permitan a construción de propostas rigorosas e innovadoras orientadas a mellorar o funcionamento do Estado rexional”.
A sesión comezou coa mesa redonda «Que ocorre coa autonomía financeira?», na que participaron Jorge Onrubia Fernández (Universidade Complutense de Madrid), Violeta Ruiz Almendral (Universidade Carlos III de Madrid) e Maite Vilalta Ferrer (Universitat Barcelona & IEB), e que foi moderada por Alain Cuenca García (Universidade de Alcalá).
A mesa redonda centrouse na autonomía financeira das comunidades autónomas, onde se analizaron as limitacións actuais do sistema, a corresponsabilidade fiscal e a necesidade de reforzar a capacidade de decisión sobre ingresos e gastos nun marco de sustentabilidade e coordinación institucional.
A seguinte das mesas foi a de «Escenarios e simulacións do novo Sistema de Financiamento Rexional», con Xoaquín Fernández Leiceaga (Universidade de Santiago de Compostela) e Ángel de la Fuente Moreno (Fedea), moderada por Melchor Fernández Fernández (Universidade de Santiago de Compostela). Nela realizouse unha análise técnica de diferentes escenarios e simulacións do novo Sistema de Financiamento Rexional (SFR), que achegou o debate teórico aos seus posibles efectos reais nos territorios e permitiu avaliar o impacto de diferentes propostas de reforma.
A conferencia de clausura, titulada «Estabilidade orzamentaria e financiamento rexional», foi impartida por Ignacio Fernández-Huertas Moraga, director da División de Análise Orzamentaria da Autoridade Independente de Responsabilidade Fiscal (AIReF).
Fernández-Huertas ofreceu unha visión integral sobre a estabilidade orzamentaria e o financiamento rexional, destacando a importancia de avanzar cara a un sistema máis transparente, equilibrado e sostible.
