O mundo que vén, segundo Escotet (Abanca): IA, incerteza xeopolítica e «policentrismo monetario»
O presidente de Abanca vincula as tensións xeopolíticas á perda de protagonismo do dólar na economía global en favor de divisas doutras potencias que gañan terreo.
O presidente de Abanca, Juan Carlos Escotet, durante a sesión inaugural do foro de debate económico, na Aula Magna do campus do IESE / Alejandro Martínez / Europa Press
Comentarios
Existe un certo consenso en que a reconfiguración das relacións internacionais abre un novo escenario de tensións xeopolíticas e incerteza que chegou para quedar. Iso opina o presidente de Abanca, Juan Carlos Escotet, que participou este mércores nun evento organizado pola escola de negocios IESE no que advertiu do claro “retroceso, aínda que non perda” do multilateralismo e dun escenario de base marcado pola volatilidade. O que antes era unha excepción, agora é a norma, e esixe unha adaptación por parte de todos.
O banqueiro advertiu que as administracións terán que tomar decisións de xeito máis áxil, para logo centrar as súas reflexións no campo que lle é propio, o da economía. Argumentou Escotet que a preocupación pola seguridade e a autonomía estratéxica gañará peso o nearshoring —estratexia empresarial na que unha compañía traslada parte da súa produción ou servizos a un país xeograficamente próximo— e o friendshoring —práctica de trasladar as cadeas de subministración e produción a países considerados aliados políticos e económicos—.
Isto ten desvantaxes en canto aos custos de produción, segundo sinalou. En contrapartida, destacou que a Intelixencia Artificial (IA) xerará “ascensos considerables de produtividade”, o que podería “compensar as tensións inflacionistas”, aínda que considera que o efecto non se está a dar ao ritmo esperado.
O poder do dólar
Escotet considera que a xeopolítica lle fixo un takeover á economía. “Dun mundo bipolar pasamos a un mundo multipolar, non só multipolar en termos de poder, senón tamén en termos monetarios”, dixo. O presidente de Abanca vaticinou que a economía encámase a un “policentrismo monetario“, e como exemplo diso profundou na perda hegemónica do dólar en favor de divisas doutras potencias que gañan terreo.
“Hai indicios de que o dólar perdeu parte do seu protagonismo, e iso ten unhas consecuencias moi relevantes. Se revisamos, no ano 2000, o 71% das reservas internacionais dos bancos centrais estaban representadas en dólar, hoxe esa cifra é escasamente do 51%”, resaltou o banqueiro.
Os ‘neobancos’
Respecto aos novos competidores con estruturas máis simples como os neobancos, Escotet asegurou que “hai unha profunda asimetría regulatoria que xera desvantaxes comparativas“. “Non están suxeitos a regulacións convencionais, claramente están noutras xurisdicións moito máis laxas, e non teñen os requirimentos de capital que temos os bancos tradicionais”, destacou.
A pesar de todo, o representante da entidade financeira recoñeceu que tempo despois da fundación deste tipo de compañías —entre cinco e oito anos—, terán que converxer cos criterios sobre os cales os bancos tradicionais están xestionados. “Pero no camiño, pois claramente xogan cunha vantaxe”, concluíu.
