Os números do sector forestal galego: supera as 3.300 empresas e roza os 2.500 millóns en ingresos

• Rueda pide «explicacións» ao PSOE tras a imputación de Zapatero no ‘caso Plus Ultra’
• Miles de persoas enchen Santiago no Día das Letras para denunciar a «emerxencia lingüística» do galego

O sector forestal-madeira supera as 3.300 empresas e lidera a produción a nivel estatal tras facturar en 2025 case 2.500 millóns, o que representa o 1,7% do PIB galego. 

O director da Axencia Galega da Industria Forestal (Xera), Alfredo Fernández, destacou este martes en Santiago a boa saúde do sector no acto de presentación do Informe da cadea forestal madeira 2025 elaborado en colaboración coa Escola de Enxeñaría Forestal. O acto tamén contou coa participación do director xeral de Defensa do Monte, Manuel Francisco, e da directora xeral de Planificación e Ordenación Forestal, Luisa Piñeiro.

Fernández explicou que a cadea forestal-madeira consolídase como un dos principais sectores industriais da Comunidade ao liderar a produción forestal en España cunha facturación en 2025 de case 2.500 millóns de euros e ter presenza no 95% dos concellos galegos.

Tal e como se desprende do informe, o ano pasado, Galicia aproveitou case 11 millóns de metros cúbicos de madeira, o que supón máis do 50% de toda a madeira aproveitada en España, afianzándose, deste xeito, “como unha das rexións europeas máis avanzadas en mecanización de corta e extracción”.

Emprego e exportacións

En canto ao emprego, as catro ramas principais da cadea de valor (silvicultura e explotación forestal, industria da madeira, industria do papel e fabricación de mobles) suman máis de 19.400 afiliados á Seguridade Social. A esta cifra habería que engadir os profesionais autónomos e todos aqueles e aquelas que teñen a afiliación vinculada a algunha das actividades restantes da cadea como a produción de enerxía, o transporte ou a construción. Segundo explicou o director xeral, “nalgúns municipios chega a representar ata o 50% do emprego industrial, reforzando o seu papel no reequilibrio territorial”.

Por outra banda, as exportacións superaron o pasado exercicio os 1.200 millóns de euros e o sector achegou máis do 4% do comercio exterior e intracomunitario de Galicia, o que demostra unha clara vocación internacional.

Fernández apuntou que se trata dunha industria tractora para avanzar cara a descarbonización e a transición verde, posto que a madeira xoga un papel estratéxico como material clave para a transición ecolóxica.

Durante a presentación do informe, o director xeral da Axencia Galega da Industria Forestal sinalou que o Goberno galego está estruturando a súa política forestal-industrial en base a dous instrumentos fundamentais que son o Plan Forestal de Galicia e o Plan Director do Sector Forestal-Madeira que “busca reforzar a dixitalización, a sustentabilidade, a competitividade, a innovación, o investimento industrial e o talento”.

“Neste sentido, o compromiso da Xunta coa industria forestal é claro. Proba diso é que entre 2018 e 2026, o Goberno galego destinou 110,5 millóns de euros para axudas ao sector, o que supuxo un investimento inducido  de 200 millóns”, explican desde o Executivo galego.