A Xunta cuestiona as previsións do Goberno sobre o Corredor Atlántico e pide un calendario de actuacións
O conselleiro de Presidencia, Diego Calvo, sinala que a análise de accesibilidade territorial de Transportes, na que se garante para 2030 que o 99% da poboación galega estará a menos dunha hora dunha estación de alta velocidade, é "inviable" e que as cifras do ministerio non son “críbles”.
O conselleiro de Presidencia, Xustiza e Deporte, Diego Calvo, na roda de prensa do Consello da Xunta / Xunta
Comentarios
Diego Calvo, conselleiro de Presidencia, Xustiza e Deportes, urxe ao Goberno central a “achegar certezas e concrecións” respecto ao Corredor Atlántico na Comunidade e a “pasar dos titulares aos feitos”, amosando un calendario con prazos, detalles de obras e investimentos do Plan Director do Corredor.
Así o trasladou nunha nota de prensa en relación ao análise de accesibilidade territorial ás estacións de alta velocidade do Corredor Atlántico publicado polo Ministerio de Transportes e Mobilidade Sostible, no que se garante para 2030 que o 99% da poboación galega estará a menos dunha hora dunha estación de alta velocidade.
Estimación inviable
Segundo indicou o conselleiro, esta estimación é “inviable” porque hai cidades como Ferrol ou Lugo que son das “peor conectadas por tren e quedan ao marxe da alta velocidade”.
Por iso, non ve “críbles” as cifras do Ministerio, xa que, precisamente, inclúe para 2030 a Ferrol, Betanzos-Infesta ou Lugo como estacións de alta velocidade, cando acumulan unha longa lista de incumprimentos neste ámbito e obras pendentes.
Así mesmo, mostrou a súa “sorpresa” ante o listado tendo en conta as reclamacións que a Xunta trasladou durante este tempo ao Ministerio para modernizar, entre outras, as infraestruturas ferroviarias que permitan reducir os tempos de viaxe na comarca de Ferrolterra e en Lugo.
Demandas da Xunta
Diego Calvo cuestionouse se isto implica que o Executivo estatal “por fin vai atender as demandas” da Xunta para axilizar actuacións prioritarias como a prolongación da alta velocidade ata Ferrol, a modernización da liña A Coruña-Ferrol dando prioridade ao bypass de Betanzos ou desbloquear o proxecto da estación intermodal.
Ademais, no caso de Lugo, lembrou que mentres a Xunta avanza na construción da terminal de autobuses e o aparcadoiro da intermodal, esta infraestrutura non pode considerarse de alta velocidade, mentres a cidade non conte con servizos ferroviarios.
En canto á conectividade de alta velocidade no Corredor Atlántico, insistiu en que levan anos solicitando ao Ministerio un Plan Director do Corredor Atlántico “completo e rigoroso”, cun “calendario claro e actuacións e investimentos definidos”.
