O BNG critica a xestión «caótica e irresponsable» da Xunta dos fondos europeos.
O deputado e portavoz de Industria no Parlamento, Brais Ruanova, sostén que a Consellería de Economía "debería liderar a modernización da industria de Galicia" e, con todo, "ofrece números de xestión desastrosa".
Diputado y portavoz de Industria del BNG en el Parlamento, Brais Ruanova – BNG
Comentarios
“Caótica e irresponsable”. Así cualificou o deputado e portavoz de Industria do BNG no Parlamento, Brais Ruanova, a xestión da Consellería de Economía dos fondos europeos, “especialmente dos destinados ao tecido produtivo, a industria e a innovación”.
Neste sentido, advertiu de que, froito desa xestión, ficaron “sen executar” 103 millóns de euros que xa estaban orzamentados para proxectos europeos, “tal e como reflexa o último informe do Consello de Contas“, correspondente ao exercicio de 2023.
“A Consellería que debería liderar a modernización da industria de Galicia ofrece números de xestión desastrosa”, sinalou o deputado nacionalista, quen tamén se referiu a unha “perda de oportunidades para Galicia”.
Tal e como explicou, Economía adquiriu a través de fondos europeos preto de 246’4 millóns de euros, “situándose, por detrás de Medio Rural, como o segundo departamento da Xunta en participación neses fondos”.
“Dos case 246’4 millóns, só se comprometeu o 51,8 %. Pero o máis dramático é que só se pagou o 33,9 %, o que significa que só un terzo do orzamento chegou realmente aos beneficiarios”, criticou.
Recomendacións de Contas
Tamén criticou que o departamento autonómico de Economía “insista en contabilizar as baixas de créditos sen xustificación real”, unha práctica que “distorsiona a avaliación da execución para dar unha falsa imaxe de eficiencia”, desgranou.
Segundo recolleu o BNG nunha nota de prensa, cando Europa inviste en recuperación, en resiliencia e en tecnoloxía, o Goberno galego do PP “responde con atrasos, con burocracia e con ineficacia”.
Neste contexto, o portavoz de Economía e Industria do BNG no Parlamento vén de rexistrar unha batería de iniciativas para reclamar á Consellería que dirixe María Jesús Lorenzana que aplique as recomendacións do Consello de Contas e que estableza, “de unha vez por todas”, unha planificación dos fondos europeos que “xurda do diálogo cos sectores produtivos”.
Por todo iso, instou ao Goberno da Xunta a rematar con “xestións opacas e de contabilidade creativa”, con todo, entre as propostas do BNG figura avaliar as dificultades na xestión dos proxectos europeos e crear mesas sectoriais permanentes.
