O PP e o PSOE apostan polo rescate da AP-9 e o BNG pide anular a prórroga

A situación da AP-9 volve a captar a atención no Parlamento de Galicia. A Cámara galega aprobou este mércores unha iniciativa impulsada polo PPdeG -apoiada polos socialistas galegos e o deputado de Democracia Ourensana– para reclamar ao Goberno que acorde o “rescate inmediato da concesión” e a liberación do peaxe da AP-9 tras o ditame da Comisión Europea que o PPdeG considera que abre unha “oportunidade única”.

O BNG, pola súa banda, optou pola abstención xa que, segundo defendeu o deputado nacionalista Luis Bará, a prórroga da concesión debe ser “anulada” ao considerar que o rescate suporía “encher de novo os petos da concesionaria”.

O deputado do PPdeG Roberto Rodríguez foi o encargado de defender esta iniciativa que, ao seu xuízo busca “respecto e dignidade para Galicia”, con unha “AP-9 galega e cen por cen gratuíta”. O parlamentario popular fixo referencia ás prórrogas das concesións “tanto do Goberno de Felipe González como do Goberno de Aznar” para asegurar que “ningunha das decisións presentes ou futuras que poidan supoñer a transferencia ou o rescate están, a día de hoxe, condicionadas por unha decisión pasada”.

Neste sentido, o deputado popular referiuse ás críticas do PSOE e BNG á prórroga da concesión do Goberno de Aznar e defendeu que os galegos “saben que mañá non pagarán peaxes por culpa de Aznar, senón pola culpa de quen hoxe desgoberna España e polos que non son capaces de facer que Pedro Sánchez cumpra o que asinaron a cambio do seu apoio”. Ademais, aproveitou a súa intervención para acusar ao PSOE de impedir o debate deste rescate na concesión, coa “complicidade” do BNG.

Dito isto, lembrou que falta unha semana para que caduque o prazo que o Executivo estatal ten para dar resposta ao ditame da Comisión Europea que sinalou que se incumpriron as normas na prórroga da concesión concedida polo Executivo de José María Aznar no ano 2000.

Sobre iso, dixo que este procedemento abre unha “oportunidade única” que debe facer reflexionar ao Goberno sobre a conveniencia de proceder ao rescate e sostivo que “non se pode entender” a negativa do Executivo de Pedro Sánchez a “avaliar nin sequera a oportunidade de levalo a efecto”.

O PSOE apunta á sombra de Aznar

A iniciativa contou -que tivo sendas emendas do PSOE e BNG que non foron aceptadas polo PP- co apoio do deputado de Democracia Ourensana, Armando Ojea, así como do Grupo Socialista, cuxa postura foi exposta polo parlamentario Carlos López Font.

Na súa intervención, o deputado socialista considerou que a iniciativa dos populares supón “unha emenda á totalidade” á política practicada polo PP en Madrid xa que “sen decatarse a quen pon a pan pedir é ao PP”.

López Font asegurou celebrar que se estea “cada vez máis preto da declaración dunha posible ilegalidade da prórroga” concedida por Aznar e criticou o “silencio” do presidente da Xunta, Alfonso Rueda, neste asunto.

Asimesmo, afirmou que os galegos “non son parvos” e saben quen aprobou a prórroga así como quen sacou adiante as “bonificacións”. “Temos unhas bonificacións grazas ao goberno de Pedro Sánchez e estamos no camiño da gratuidade grazas a Pedro Sánchez”, defendeu.

Ademais, emprazou aos populares a apoiar a emenda presentada polo seu grupo –que foi rexeitada– para reclamar que a Xunta asuma o rescate das autoestradas da súa titularidade, como son a AG-55 e a AG-57.

O BNG pide anular a concesión

No debate, o deputado do BNG Luís Bará, que iniciou o seu discurso denunciando o “xenocidio en Palestina” por parte do Estado de Israel e o seu “orgullo” polas mobilizacións en Galicia con motivo da participación dun equipo israelí na Vuelta, incidiu en que a concesionaria da AP-9 “está a facerse de ouro” pola decisión de Aznar.

Tras acusar a PSOE e PP de “traizoar a Galicia” cada vez que “pasan o Padornelo”, defendeu que a concesión “ten que ser anulada”. “O Goberno central ten que revisar de oficio a prórroga por vulnerar o procedemento legal establecido, o Goberno central non ten que rescatar a concesión como pretende o PP, porque iso sería unha ruína para as arcas públicas” e “encher de novo os petos da concesionaria” ao “incrementar a compensación de lucro cesante”, sostivo.

Bará argumentou que “hai estudos que din que o custo que tería a anulación da concesión sería inferior aos pagos por peaxes na sombra e as bonificacións“, unha medida que, segundo dixo, “foi un avance na medida en que reduciu o custo” e “un logro do BNG nas negociacións co PSOE”.

O deputado de Democracia Ourensana, Armando Ojea, non interveu no debate.