Pontón acusa a Rueda de «submisión ante o PP de Madrid» polo «xenocidio» en Gaza

A portavoz nacional do BNG volve á carga contra Alfonso Rueda polos ataques de Israel na Faixa de Gaza. Ana Pontón acusou este sábado ao presidente da Xunta de “submisión ante o PP de Madrid” en relación á ofensiva israelí sobre Gaza: “Ninguén en Galicia entende por que se nega a condenar o xenocidio contra o pobo palestino”.

Ana Pontón reaccionou así fronte a Rueda tras a primeira reunión do curso do Consello Nacional da Xunta. “Se hai un asunto no que o nivel de submisión de Rueda ao Partido Popular de Madrid resulta humanamente intolerable é a súa negativa a condenar o xenocidio en Gaza”, aclarou Pontón, en relación á postura sobre a masacre neste territorio, que o PP, a nivel nacional, evitou chamar “xenocidio” ata o momento.

Tras mencionar ás miles de persoas asasinadas e que están pasando fame, a líder da oposición no Parlamento de Galicia preguntouse, de forma retórica, “que máis ten que pasar para que Rueda acepte que estamos ante un xenocidio”.

Neste contexto, chamou ao presidente da Xunta a rectificar na súa postura no pleno da próxima semana, no que esta será unha das cuestións centrais a través de iniciativas de diversa índole rexistradas polo BNG e o PSOE. “Espero que deixe de estar ao lado equivocado da historia”, instou Pontón.

“Un verdadeiro goberno alternativo”

En paralelo, Pontón fixo un chamamento á súa formación a “actuar como un verdadeiro goberno alternativo” fronte a un Goberno galego que “antepón os intereses do PP a Galicia” en cuestións como os incendios, a quita da débeda ou a AP-9.

Pontón acusou ao PPdeG de querer “importar” a “política da crispación e o insulto” desde Madrid. Entre outros, lembrou declaracións do voceiro parlamentario dos populares, Alberto Pazos, durante o primeiro pleno do curso, cando dixo: “Non admito que me chame carroñeiro nin a femia alfa do clan das hienas, nin o cabezallo dun comité de abutres”.

Pontón, que se deu por aludida á mención de “femia alfa do clan das hienas”, acusou ao PPdeG de utilizar a “crispación madrileña” para “tapar a súa falta de proxecto de país”. Nas súas palabras, “o Goberno de Rueda non goberna, insulta” e tamén “fai propaganda”, “busca culpables” e “traballa para as empresas amigas do PP”.

“Esta é unha estratexia consciente. Canto máis se fala dos insultos, menos se fala dos incendios, da sanidade pública, da educación, da luz ou da precariedade laboral que sofren miles de galegos e galegas”, expuxo. En contraposición, situou a “prioridade” do BNG na defensa “con dignidade” dos intereses de Galicia.

A crise dos incendios

A xestión da onda de incendios deste verán, así como os que actualmente queiman terreo en Pantón (Lugo) e O Bolo (Ourense), foi outros dos exemplos de “desgoberno” que situou a portavoz nacional do BNG, que enviou o seu apoio aos veciños afectados polos lumes aínda activos no interior de Galicia.

Neste senso, afeou ao PPdeG “35 anos de políticas de abandono do medio rural e de eucaliptización”, que converten ao monte “nun polvorín”. “Lonxe de pedir perdón por unha xestión nefasta, Rueda optou pola prepotencia política e pola autoexculpación, sen asumir erros nin responsabilidades”, censurou.

A continuación, instou ao presidente a aceptar a comisión de investigación sobre incendios pedida polo BNG para analizar que fallou e tomar medidas para prevenir situacións similares.

Na mesma liña, pediu apostar por un modelo forestal “a favor do rural, do territorio e do medio ambiente” e “deixar atrás unha política ao servizo das papeleiras”: “A política forestal deste país non a poden marcar nin Ence nin Altri“.