O PP galego e o BNG chocan pola Constitución de 1978

Visións contrapostas do PP galego e o BNG a conta do Día da Constitución. O presidente da Xunta, Alfonso Rueda, reivindicou a Constitución Española de 1978 como un marco que recoñece a “diversidade territorial” e “garante o autogoberno de Galicia”.

A través dunha mensaxe no seu perfil oficial da rede social X, Rueda lembrou que a Carta Magna “fixo posible a convivencia en liberdade, estabilidade e progreso”. “Galicia seguirá defendendo unha España plural e con dereitos para todos”, recalcou Rueda na mensaxe, que acompañou cunha imaxe na que se mostran izadas a bandeira de Galicia e de España.

Pontón clama contra a Constitución

Por outra banda, a voceira nacional do BNG, Ana Pontón, reclamou “un novo estatuto político” para Galicia, superando o marco dunha Constitución “herdada do franquismo” e defendeu un autogoberno “real e libre de interferencias centralistas”.

Durante a celebración no Panteón de Galegos Ilustres da fundación do Partido Galeguista o 6 de decembro de 1931, a líder do BNG reclamou “democracia plena e o recoñecemento de Galicia como unha nación que ten dereito a un autogoberno real, con capacidade de decisión para xestionar os nosos recursos”, incidiu Pontón.

A continuación, nunha declaración política, defendeu a necesidade de “blindar” a capacidade plena de decisión de Galicia en “ámbitos clave” para o desenvolvemento económico, social e cultural, “sen interferencias centralistas”. Pontón denunciou que o actual marco constitucional “perpetuou e acentuou” a “dependencia e o centralismo” que denunciaba Castelao e o Partido Galeguista.

“Tiñan claro que esa dependencia política e as agresións e expolios derivados eran a causa do atraso de Galicia e da imposibilidade de mirar cara a un futuro mellor”, argumentou a líder nacionalista. A súa xuízo, “non poden” celebrar unha Constitución que “nega, limita os dereitos e aspiracións nacionais”, que “pone trabas” ao desenvolvemento e benestar e que “consolida unha institución tan anacrónica e antidemocrática como a monarquía”. Ademais, Pontón destacou que o BNG cada vez “concita máis apoios e ilusión” como a “única alternativa” que ten a comunidade galega para “conseguir a transformación social” que necesita.

“O PPdeG sabe que somos a alternativa solvente e cada día están máis nerviosos”, asegurou Pontón, ao tempo que afirmou que os ataques, “cada día máis agresivos”, que recibe o BNG desde as filas populares son “a mellor demostración de que o BNG está no camiño correcto”.