O novo dono de Audasa establece a obriga de que a AP-9 pague dividendos ata 2035

Audasa, a concesionaria da AP-9, aprobou repartir 100,8 millóns en dividendos a cargo dos resultados do exercicio de 2025, é dicir, a totalidade dos beneficios que xerou o ano pasado cos peaxes da principal autoestrada galega. Non é unha novidade, pois en 2024 tamén repartiu os 90 millóns que gañou aquel curso; e todo apunta a que así seguirá nos próximos anos. E farano por contrato. Itínere, o grupo de infraestruturas que controlan APG e Swiss Life, estableceu a obrigatoriedade de que Audasa entregue dividendos como condición a un préstamo intragrupo concedido en xaneiro de 2025 e que serviu para refinanciar a débeda de adquisición de ENA, a antiga empresa pública de infraestruturas privatizada durante o Goberno de José María Aznar.

Explícao en detalle a propia concesionaria da AP-9 con motivo dunha emisión de obrigas de 66 millóns que lanzou o pasado maio. O folleto, ao analizar os distintos factores de risco que ameazan a empresa, sinala que Enaitinere concedeu un préstamo de 845,3 millóns á súa filial ENA, á súa vez, accionista única de Audasa. Enaitinere é unha sociedade intermedia, propiedade ao 100% de Itínere, o grupo que controlan o fondo holandés APG e a aseguradora Swiss Life.

“No clausulado do contrato asúmense determinados compromisos en relación co reparto de dividendos”, adianta o documento. E estes tradúcense en que a xestora da autoestrada galega distribúa “o maior importe posible do seu beneficio neto, en función da liquidez dispoñible, co cumprimento dos requisitos esixidos pola lexislación mercantil e, na medida en que exista remanente de tesouraría, mediante préstamos intragrupo”.

Límite temporal e financeiro

Esta obriga de distribuír dividendo ten un mecanismo sinxelo de aplicación. ENA, como accionista única da concesionaria da AP-9, comprométese a exercer o seu dereito de voto nos órganos de goberno para aprobar a máxima retribución posible. A cantidade establécese en función das “disponibilidades de tesouraría despois de atender a totalidade das súas obrigas de pago”, explica o folleto. Tamén hai un límite temporal. O compromiso de distribución de dividendo “estará vixente ata a data de finalización do préstamo, establecida o 17 de febreiro de 2035“.

O crédito a ENA, que inclúe no seu contrato esta condición, foi concedido en xaneiro de 2025, tres meses despois de que APG tomase o control de Itínere ao comprar o 40% en mans de Globalvía. A aseguradora Swiss Life completou a súa entrada na autoestrada a finais do ano pasado, ao conseguir o visto e prace das autoridades europeas.

O fluxo de dividendos

Para que o dividendo chegue á matriz, APG fixo esta mesma obriga de distribución para a propia ENA, a filial que controla Audasa. Esta sociedade tamén ten a obriga de aboar “todo o fluxo de caixa distribuíble despois de atender todos e cada un dos seus compromisos de pago e co cumprimento dos requisitos esixidos pola lexislación mercantil”. Como sucede coa concesionaria da AP-9, esta distribución pode facerse mediante dividendos, dividendos a conta ou, “na medida en que exista remanente de tesouraría, mediante préstamos intragrupo”.

Deste xeito, o diñeiro que logra Audasa na AP-9, a autoestrada máis rendible de Itínere, pasará primeiro a ENA e, desde esta filial, a Enaitínere, controlada pola matriz do grupo, que tamén xestiona as autoestradas da Xunta AG-55 (A Coruña-Carballo) e AG-57 (Puxeiros-Val Miñor). Precisamente, Itínere aprobou este ano o primeiro dividendo desde a privatización de ENA: 109 millóns. Ese diñeiro foi a parar principalmente a APG, que ten o 58% do grupo, e a Swiss Life, dono do 37,5% do capital.