Recursos de Galicia duplicará o seu capital para gañar músculo e atraer novos investidores
A sociedade público-privada pasará de ter un capital de 43,6 millóns a entre 100 e 150 millóns, aínda que a Xunta manterá a súa participación como primeira accionista.
María Jesús Lorenzana, conselleira de Economía, e Emilio Bruquetas, conselleiro delegado de Recursos de Galicia / Xunta
Comentarios
A sociedade público-privada Recursos de Galicia levará a cabo unha nova ampliación de capital co obxectivo de pasar de 43,6 millóns a unha cantidade de entre 100,6 e 150,9 millóns de euros. É dicir, como mínimo, duplicará o seu capital, segundo anunciou Alfonso Rueda como presidente da Xunta, que retén unha participación na utility dun 30%.
Tras a reunión do Consello do Executivo autonómico desta mañá, a Xunta indicou que esta operación dará continuidade ao anuncio realizado polo presidente no Debate sobre o Estado da Autonomía do pasado mes de abril.
Máis músculo financeiro
Esta iniciativa “dará músculo financeiro” a RDG para “estender á cidadanía os beneficios derivados dos recursos naturais“, tal como recolle a lei de promoción dos beneficios sociais e económicos dos proxectos que utilizan os recursos naturais de Galicia.
Deste xeito, a Xunta reorganizará os seus activos para garantir que o aproveitamento dos recursos naturais quede na comunidade.
A Xunta achegará a súa participación en activos enerxéticos
Así, o investimento que realizará o Goberno galego na ampliación de capital, a primeira destas características que pon en marcha RDG, será en especie, achegando as súas participacións en activos enerxéticos dentro do territorio galego.
O valor desta achega será fixado por un experto independente designado polo Rexistro Mercantil. Deste xeito, a Xunta entrará cunha achega en especie con ditas participacións: o seu 30,92% de Nedgia Galicia e o entre o 3% e o 4% que o Inega dispón en seis parques eólicos.
Entrada de novos socios
Na ampliación de capital poderán participar todos os socios fundacionais de RDG e outros novos do sector privado. Por iso, iniciarase esta semana un proceso de diálogo co sector empresarial para facilitar a participación de todas aquelas compañías que desexen sumarse, con independencia do seu tamaño.
Está previsto que a sociedade alcance un capital de entre 100,6 e 150,9 millóns de euros, mantendo a Xunta un peso similar ao actual, que supera o 34%.
