Rueda pide a Sánchez que despregue «canto antes» o Exército e promete axudas aos afectados.

O presidente da Xunta move ficha ante a onda de incendios que azouta a Galicia. Alfonso Rueda sinalou que este domingo será unha xornada “complicada” na extinción de incendios que asolan a provincia de Ourense, onde se mantén a situación 2 e pediulle ao presidente do Goberno, Pedro Sánchez, que mobilice “canto antes” ás Forzas Armadas.

Rueda realizou estas declaracións tras reunirse este domingo con Pedro Sánchez e o ministro do Interior, Fernando Grande-Marlaska, no Centro de Coordinación Operativo Contraincendios de Ourense.

Durante este encontro, Rueda fixo referencia á “mentalidade práctica e de coordinación” que tivo a Xunta durante estes días, así como ás necesidades que, a xuizo dos técnicos, son precisas para facer fronte á onda de incendios. “Foi o persoal técnico que está traballando no CECOPI, o que elaborou as necesidades que trasladamos á Administración Xeral do Estado. Son medios absolutamente imprescindibles”, apuntou Rueda.

Nesta liña, o presidente galego pediu a mobilización das Forzas Armadas para “colaborar” co servizo de extinción de incendios para, exemplificou, facer faixas ou cortalumes. “O que espero, despois desta reunión, é que todo isto se poida levar a cabo canto antes e canto antes é xa”, remarcou ao tempo que considerou que a súa petición é “lóxica” e espera que sexa atendida “á maior brevidade”.

As axudas para os afectados

En paralelo, Rueda e Sánchez tamén abordaron os pasos a seguir tras a extinción do lume que, en palabras de Rueda, pasa por “axudar á xente” que se viu afectada pola onda de incendios.

Por iso, o presidente galego avanzou que este luns a Xunta reunirase cos técnicos para preparar as diferentes ordes de axudas e que se poidan “lanzar inmediatamente” no primeiro Consello que realice o Executivo galego. “Comprometín ante o presidente do Goberno esta celeridade e eficacia por parte da Xunta e pedinlle, logicamente, que se produza esa celeridade nas axudas do Goberno central“, esgrimiu Rueda.

Alfonso Rueda agradeceu a Pedro Sánchez que viaxase á provincia de Ourense para coñecer de primeira man o que vive Galicia ante a onda de incendios que desde hai máis dunha semana asolan a comunidade. Tamén deu as grazas a todo o persoal que traballa na loita contra os incendios forestais e á cidadanía que “unha vez máis” deu un “exemplo de civismo e de cooperación” cos corpos de seguridade.

Unha ducia de lumes aínda activos

En canto ao balance dos incendios, Rueda subliñou que actualmente hai 12 lumes activos na comunidade, todos eles concentrados na provincia de Ourense. “Segue habendo perigo para as vivendas e de aí a necesidade de facer confinamentos e evacuacións da poboación”, detalhou Rueda ao tempo que afirmou que a seguridade das persoas é “o importante”.

A continuación, subliñou que o criterio “volve ser a seguridade por riba de todo”. “Cando se decreta un confinamento ou unha evacuación é porque é absolutamente necesario”, apuntou o presidente autonómico. Actualmente, detallou Rueda, hai despregados na provincia de Ourense máis de 3.000 profesionais de servizos de prevención e defensa contra incendios forestais, máis de 300 bombeiros de toda Galicia; 343 persoal de extinción das brigadas municipais; 380 motobombas; 36 buldócer e 32 medios aéreos.

A isto débense sumar todos os efectivos das forzas e corpos de seguridade, Guardia Civil, Policía Nacional, Unidade Militar de Emerxencias.