A presión sindical obriga a Navantia a ampliar o prazo para aprobar o plan estratéxico

Navantia amplía o prazo ata o próximo 30 de xuño para que os sindicatos presenten as súas propostas ao plan estratéxico “Horizonte 2029”. A aprobación do plan estaba programada para o próximo 30 de xuño. Con todo, tras as queixas dos sindicatos, a empresa pública decidiu darlles algo máis de tempo “sendo sensibles ás súas preocupacións”.

CCOO denunciaba este pasado mércores nun comunicado que non había “voluntade real de negociación cos representantes dos traballadores, dado que o plan estratéxico se entregara con apenas uns días de marxe”.

“É evidente que a dirección menospreza o diálogo social, a participación e a negociación. Únicamente queren cubrir o expediente”, reiteraban, cualificando a situación de “inaceptable”.

Outras críticas a Navantia

Así mesmo, desde a organización liderada por Unai Sordo criticaban que este plan “repite unha fórmula antiga, baseada en grandes anuncios, obxectivos inflados, moita propaganda e, unha vez máis, o cadro de persoal colocado no centro dos sacrificios”. Para o sindicato, o propio documento recoñece “problemas estruturais” que CCOO leva anos denunciando, como é a subactividade, a dependencia de decisións políticas, elevados custos na organización estrutural da empresa sen beneficio económico e ausencia dunha planificación industrial estable.

“O grave é que, unha vez máis, as solucións pasan por axustes organizativos, flexibilidade laboral e reordenación do cadro de persoal, é dicir, por trasladar e aumentar a presión ás persoas traballadoras en lugar de afrontar o verdadeiro debate de fondo: que modelo industrial necesita Navantia e se hai compromiso real para sostelo”, reprochaba o sindicato.

Ante isto, CCOO esixía á Sociedade Estatal de Participacións Industriais (SEPI) transparencia para evitar unha “privatización encuberta” da empresa pública, así como un novo impulso na renovación do cadro de persoal mediante o aumento da contratación de persoal propio para evitar a perda de coñecemento e man de obra, e claridade nas inversións, que deben garantirse mediante orzamentos “firmes e claros” para unha modernización que garanta a competitividade con estaleiros punteiros.

Segundo CCOO, o plan vende obxectivos ambiciosos como duplicar ingresos, aumentar marxes, crecer en emprego e acadar unha alta ocupación industrial, pero o propio texto admite que todo iso depende de factores externos como programas do Ministerio de Defensa, decisións da Unión Europea ou a evolución xeopolítica.