Rueda insiste en que a transferencia da AP-9 a Galicia é «inaceptable» sen financiamento
O presidente da Xunta cualifica de "sorprendente" que "os mesmos partidos" que votaron por unanimidade o acordo na Cámara autonómica agora voten "todo o contrario".
O presidente da Xunta, Alfonso Rueda, antes do Consello. – DAVID CABEZÓN @ XUNTA
Comentarios
“Inaceptable”. Así cualificou Alfonso Rueda o acordo para o traspaso a Galicia da titularidade e a xestión da AP-9 aprobado este xoves no Congreso por non implicar financiamento e ir en “sentido contrario” ao pactado polos partidos no Parlamento galego.
En declaracións aos medios tras asistir á toma de posesión da reitora da Universidade de Vigo, o presidente da Xunta cualificou de “sorprendente” que “os mesmos partidos” que votaron por unanimidade o acordo na Cámara autonómica agora voten “todo o contrario”, e afeou aos socialistas e nacionalistas que rexeitaran as emendas do PP no Congreso, votando no mesmo sentido que Vox. “Sempre falan de que non hai que votar as cousas con Voz, pois agora Vox, o PSOE e o BNG votaron no Congreso en contra dun acordo do Parlamento de Galicia”.
“Non ten ningún sentido”
O mandatario galego sinalou que a Xunta vai seguir defendendo unha transferencia financiada e alertou de que, nestes momentos, co texto actual, “existe un risco moi certo de que se cargue a Galicia ata con 4.000 millóns de euros”. “Non ten ningún sentido, e isto non o farían coas transferencias a outras Comunidades Autónomas que todos temos na cabeza”, apostilou.
Por iso, o presidente autonómico volveu reclamar que a transferencia vaia acompañada do financiamento necesario, algo “absolutamente xusto” e explicou que espera que no Senado se aproben emendas nese sentido. “Oxalá que cando (o texto) volva ao Congreso se respecten esas emendas. Supoño que non, que volverán a votar en contra do que acordamos no Parlamento de Galicia”, vaticinou.
Finalmente, apuntou que, “se toca negociar a transferencia”, a Xunta manterá “a postura coherente” de defender ese traspaso con financiamento. “O que non pode ser é que xa nos estertores da lexislatura se tome este acordo ás présas, sen consultar practicamente a ninguén e que sexa sen financiamento”, criticou, e engadiu que os impostos dos galegos non deben usarse para asumir ese custo, e para que alguén se poña “unha medalla política”.
