Rueda perfila os orzamentos de 2027 coa vivenda, a dependencia e a Atención Primaria como prioridades

• Rueda defende a «oportunidade histórica» para Ferrol con SAIC e ve «chocante» que Defensa cuestione o proxecto
• Rueda anima a visitar Galicia para ver o eclipse desde «unha posición privilexiada»

Co teito de gasto aprobado no Parlamento galego, o presidente da Xunta comeza a perfilar as prioridades dos Orzamentos de 2027. Alfonso Rueda sitúa entre os seus obxectivos reforzar “o plan de choque para a dependencia”, mellorar a Atención Primaria e dar un novo impulso ás políticas de vivenda. Neste último ámbito, deixa ademais a porta aberta a aprobar novas rebaixas, se as contas públicas o permiten. 

Así o apuntou este sábado nunha entrevista con Europa Press, na que cuestionado sobre posibles iniciativas para as contas do próximo ano, sinalou que lle parece “bastante medida estrela” seguir co foco na vivenda, con “estímulos” a promotores e cooperativas para que constrúan inmobles.

En materia de rebaixas fiscais, ademais de garantir que non se “suprimirá” ningunha, adiantou que se fora “posible”, desexaría seguir profundando nos beneficios fiscais con algunha nova orientada ao sector da vivenda. O fin, dixo, é “axudar á xente con menos impostos para que poida mercar vivenda”.

Ademais, tamén quere profundar en servizos sociais e apunta a dependencia. No último debate autonómico de política xeral comprometeu que o ‘Bono Coidado no Fogar’, que concede 5.000 euros anuais ás persoas dependentes atendidas no seu propio domicilio, estenderase a 10.000 beneficiarios adicionais no que resta de lexislatura –ata chegar aos 50.000–.

O terceiro dos piares relevantes, segundo citou, é o plan de reforma da Atención Primaria, do que xa se coñecen algunhas propostas que o Sergas puxo sobre a mesa, como o aumento de prazas de enfermaría ou a incorporación de novas categorías como os podólogos aos centros de saúde.

As novas medidas avanzaranse cando toque “por respecto á negociación”, pero Rueda confesa que está “moi esperanzado” con ese plan, do que destaca que levará “máis recursos” públicos e suporá “un esforzo económico” relevante para a comunidade. “Pero non só iso, tamén é un esforzo de organización, de cambio da cultura asistencial”, apostilou.

Financiación autonómica

O mandatario galego ten “moi poucas esperanzas” de que poida fructificar un acordo sobre financiación autonómica a nivel estatal. Preguntado sobre financiación local e a futura lei de administración local na que traballa a Xunta ás portas dun ano electoral, Rueda ratificou que, ao igual que a nova lei de incendios, “a idea” é que esta normativa sexa enviada ao Parlamento para o seu debate e aprobación no novo período de sesións que arrinca en setembro.

Vé “bo” que, como “última solución”, a norma manteña a opción de que a Xunta poida forzar unha fusión de municipios se algún “se volve absolutamente ingestionable”, pero recalca que a aposta do seu Goberno é promover só as unións “voluntarias”. Sobre financiación local, destaca que a lei inclúe novidades “importantes” e “garante un mínimo sempre no Fondo de Cooperación Local”.

Tamén pon deberes aos seus ante as cada vez máis próximas municipais de 2027: quere gobernar nas catro deputacións –agora mesmo o PPdeG ten as de Ourense e Pontevedra–. Aínda sen descartar “nada” –preguntado por Vigo–, recoñece que “vai ser moi difícil” lograr facerse co bastón de mando nas sete urbes. “Pero, desde logo, algunha máis das que temos si”, sinalou, para apostilar coa súa meta: “Mellorar o número de concelleiros, en todas”.

Absentismo laboral

Sobre o  plan contra o absentismo no que traballa a Xunta, que aínda está pendente de presentarse, Rueda reafirmouse en que existe o “fraude” nas baixas laborais. “¿Que son a inmensa maioría? Non, para nada. Ao contrario. Son unha parte do problema, nin sequera son a causa principal. E hai outros que recoñecemos como a lentitude en solicitar probas a traballadores que entran nunha baixa”, apuntou.

En todo caso, recalca que tamén hai áreas nas que a Xunta actuou ao observar que había “un número moi significativo de baixas por riba da media doutras zonas”. “E o que podo dicir é que nas zonas onde se daba unha disfunción, despois das actuacións chegou a haber ata un 40% de altas. Deixo aí ese dato”, dixo.

O presidente da Xunta tamén apuntou ás empresas, ás que, unha vez “aceptado” que hai “un problema”, insta a “implicarse na solución”. Para Rueda, as empresas “non poden pretender” que “só as administracións solucionen” estas dificultades porque “entón non funcionará“. “Teñen que preocuparse da saúde laboral dos seus traballadores”, advertiu.

“E saúde non é só física, tamén a saúde mental. E claro que poden facer cousas. Só a Xunta non o vai solucionar”, continuou, antes de proclamar, iso si, que o seu Goberno o que tampouco pode facer é “poñerse de perfil” e dicir que “só é un problema das empresas”.

Altri, Indra e SAIC

No campo económico, Rueda reflexiona sobre o proxecto da pasteleira portuguesa Altri en Palas de Rei, do que “pensaba” e aínda pensa que era “un bo proxecto” para unha zona de Lugo que se tería “beneficiado preservando o medio ambiente”. Atribúe ao Goberno telo feito “imposible” ao “deixalo sen acceso a ningún tipo de axuda europea” e “sen conexión eléctrica”.

“Deixou unha zona da provincia de Lugo sen conexión eléctrica. Espero que non teñamos que arrepentirnos se vén algunha outra instalación que necesita potencia nesa zona”, advertiu o mandatario autonómico, moi satisfeito cos plans de SAIC en Galicia, aínda que prudente sobre se haberá algún tipo de efecto chamada para outras inversións chinesas.

“Non sei como funcionan estas cousas en China, pero o boca a boca, se o facemos ben, desde logo non vai ser negativo”, limitouse a manifestar, antes de apuntar a outros sectores como o da defensa, onde esta mesma semana Indra confirmaba que porá en marcha unha nova planta de produción de vehículos militares en As Pontes (A Coruña).

AP-9

Noutra orde de asuntos, tras afirmar esta semana que a obriga da Xunta é sentarse a negociar a transferencia da AP-9, preguntado acerca de se considera que o seu xefe de filas, Alberto Núñez Feijóo, facilitará o traspaso “financiado” que el demanda se goberna en España, Rueda dérono por feito.

Como argumento, lembrou que a transferencia “xa era unha reivindicación” súa en Galicia, polo que “non tería ningunha explicación” que “deixase de apoiala”. Iso si, co trasfondo de que a Comisión Europea declarou ilegal a prórroga aprobada polo Goberno estatal, con José María Aznar de presidente, reiterou o seu rexeitamento á lei pactada por PSOE, BNG e Sumar: “Non garante un traspaso financiado”.

Ano Xacobeo

Ás portas do Ano Santo e sobre unha posible visita a Galicia do papa León XIV, afirmou que as súas “sensacións” son “boas”. “Pero ata que non o vexa definitivamente confirmado”, prefire ser “conservador”, que ve “unha boa postura” en asuntos que atinxe á Igrexa, e por “facer as cousas ben”.

En canto a concertos, tamén apelou á prudencia, aínda que considera que “no Xacobeo ten que haber un par de actuacións que se lembren moitísimo tempo”. Iso si, aposta por descentralizar eventos e, máis que unha cifra histórica de peregrinos, desexaría unha presenza “ao longo de todo o ano”. O obxectivo: que “todo o mundo mire” a unha Galicia “de moda” en 2027.