Máis dun milleiro de persoas concéntranse en Santiago por “a paz e soberanía” en Venezuela.

Máis de mil persoas manifestáronse este sábado, 10 de xaneiro, en Santiago de Compostela contra o “imperialismo ianqui” e pola “paz e soberanía” de Venezuela. Convocada pola Asociación Galego-bolivariana Hugo Chávez (Agabo), a concentración foi secundada por sindicatos, asociacións e formacións políticas.

En palabras da súa presidenta, Ana Mosquera, “isto non vai só de Maduro nin do pobo de Venezuela, senón da paz do mundo”. “Estamos deixando de lado as normas que nos puxemos como humanidade para convivir e está imperando a lei do máis forte. Temos que pedir aos nosos gobernantes que sexan firmes nisto e que se volva de novo a acatar a normativa internacional e a respectar a soberanía dos pobos”, reivindicou.

Nesta liña, o cónsul de Venezuela en Galicia, Martín Pacheco, sinalou aos medios de comunicación que a agresión estadounidense é “condenable” en todo o mundo e que Venezuela é “un país pacífico que nunca promoveu nin participou en agresións a ningún Estado”. “Estamos contra o imperialismo, estamos contra o fascismo e condenamos enérxicamente estas actitudes”, enfatizou.

A marcha saíu da Alameda ás 12.00 horas nunha xornada soleada na que participaron máis de mil asistentes. Durante o percorrido, portaron pancartas e bandeiras, ao berro de ‘Venezuela vencerá’; ‘O imperialismo é terrorismo’, e ‘Os ianquis asasinan, Europa patrocina’, entre outras consignas.

Tras rodear a Praza de Galicia por completo, os manifestantes percorreron as rúas do casco histórico da capital galega ata chegar á Praza das Praterías, onde se realizou a lectura dun manifesto.

A presidenta de Agabo comezou a súa intervención denunciando que este ataque inicia unha nova época na que de forma “grosera” Estados Unidos pretende “exercer o imperialismo” sen “gardar sequera as formas”.

“É hora de denunciar con firmeza estas prácticas imperialistas e solidarizarnos co pobo venezolano. Pero tamén co conxunto dos pobos de América Latina que viven bloqueados polos Estados Unidos de América, algúns desde hai décadas como Cuba. E outros que sofren ameazas como Colombia ou México”, proclamou.

Por todo iso, no manifesto demandan a “liberación inmediata e segura” do presidente Nicolás Maduro e a súa muller Cilia Flores; o “cese total” da agresión militar imperialista e o “respecto absoluto” á integridade territorial de Venezuela.

Tamén, solicitan á comunidade internacional que “actúe con firmeza e condene de forma unánime” esta violación e traballe para restaurar a lexitimidade baseada no Dereito e a soberanía popular e o “cese inmediato de inxerencias” no resto de nacións.

“Isto non é só sobre Nicolás Maduro. Isto é sobre se aceptamos a aplicación da lei do máis forte, da forza bruta impoñéndose sobre as regras mínimas de convivencia dos pobos e no marco da normativa internacional”, enfatizou Mosquera.

Así mesmo, insistiron na lexitimidade de Maduro como presidente e mostraron o seu apoio á presidenta encargada Delcy Rodríguez, que “con dor asumiu esta misión”, no marco da Constitución venezolana.

Apoio político

A concentración contou con respaldo político do BNG, representado polo deputado do Bloque no Congreso, Néstor Rego e a coordinadora de Relacións Internacionais do BNG, Ana Miranda; e Esquerda Unida, co seu coordinador nacional, Lino Costas.

Neste contexto, Miranda remarcou ante os medios de comunicación o “rotundo e enérxico rexeitamento” da súa formación á agresión militar sobre Venezuela e á “vulneración do dereito internacional”. Así mesmo, alertou de que unha agresión como esta “pode producirse en calquera lugar do mundo”

“Ninguén está seguro no mundo con Trump, está actuando como un matón, rompendo as normas multilaterais das Nacións Unidas e fundamentalmente cuestionando o dereito internacional nun momento no que ninguén é alleo ao que pode pasar”, insistiu.

Con todo, concluíu que “ou se opta polo dereito á selva ou polo dereito internacional”, e lembrou que o BNG é unha organización “pacifista, que defende o multilateralismo, o diálogo e a resolución pacífica dos conflitos”.

Segunda manifestación 

Esta é a segunda manifestación convocada por Agabo, despois de que o pasado sábado, 3 de xaneiro, se concentrasen arredor de 400 persoas fronte ao Consulado de Venezuela en Vigo, horas despois do ataque. A convocatoria foi secundada por BNG, CIG, CUT, Mar de Lumes, Movemento Arrendista, PCG, PCRG, Podemos Galicia e UPG.

Durante a cita, realizouse a lectura dun manifesto, co obxectivo de “sumar a voz de todas as persoas indignadas polo ataque brutal” cometido polas forzas militares estadounidenses con “violencia e o secuestro do presidente”.