Os venezolanos en Galicia reclaman un goberno de transición e eleccións «democráticas»

O presidente da Federación Venezolana de Galicia (Fedega) revela os seus anhelos de cara á nova etapa que se abre no país sudamericano. Manuel Pérez, defendeu un goberno de transición durante uns meses, seguido da celebración de unhas eleccións “democráticas” e “respaldadas pola comunidade internacional”.

En declaracións á axencia Europa Press, Pérez asegurou que valoran o sucedido con “moita emoción e entusiasmo” e que se atopan “ansiosos” á espera de que saia a líder da oposición, María Corina Machado, para que dea algunha instrución e poder ver “cara onde vai xirar agora o país”.

Neste sentido, Pérez indicou que este sábado a partir das 18.00 horas levarase a cabo unha concentración de venezolanos na Praza Elíptica de Vigo. Unha cita que se levará a cabo dúas horas antes da manifestación convocada pola Asociación Galego-Bolivariana Hugo Chávez (Agabo) fronte ao Consulado da República de Venezuela para “condenar o ataque”. Ao seu xuízo, Trump “ven axudar a un proceso de cambio cara á democracia en Venezuela”.

“Transición pacífica e organizada cara á democracia total”

De cara ao futuro, apuntou cara á implantación dun goberno transicional durante uns meses, para posteriormente realizar unhas eleccións respaldadas pola comunidade internacional. “Por suposto, deben ser libres e non manipulables. Ese é o problema”, indica.

Manuel Pérez sinalou aos organismos internacionais e gobernos europeos, por “ter mirado cara a outro lado” cando tiñan que “exixir que gobernase o que gañou as eleccións”. “Creo que a comunidade internacional neste momento ten que poñerse do lado do pobo de Venezuela, ir a favor dunha democracia e unha transición cara a ela, como todos aspiramos en calquera parte do mundo”, enfatizou.

Con todo, concluíu defendendo unha “transición pacífica e organizada cara á democracia total” do país. “Porque oito millóns de venezolanos no exilio non quere dicir que haxa unha democracia no país”, concluíu.