A mineira do macroproxecto de litio pegada á fronteira de Galicia pecha unha ampliación de capital de 10 millóns.

Savannah Resources, a mineira detrás do macroproxecto de litio no concello luso de Boticas, a uns 25 quilómetros da fronteira con Galicia, acaba de pechar unha ampliación de capital coa que recadou aproximadamente 12 millóns de dólares, uns 10,4 millóns de euros ao cambio.

Segundo explicou a compañía este martes nun comunicado, o 50% do importe conseguido procede de investidores portugueses; con iso, o 27% do capital quedaría en mans lusas.

Antes da rolda de financiamento os principais accionistas eran AMG Lithium B.V., que controlaba un 15,66% do capital, seguido de Al Marjan LTD, co 12,34%, o Grupo Lusiaves e Pluris Investments, cun 10%, e Slipstream Resources International Pty Ltd, cun 3,17%.

Tras a ampliación de capital emerxe como un dos investidores clave o fondo luso Optimize Portugal Golden Opportunities Fund, xestionado por Optimize Investment Partners.

Expectativas para a mina

O pasado agosto Savannah Resources fixo públicos os resultados de unhas probas coas que confirmaron os “altos e consistentes” niveis de litio nos principais depósitos do xacemento. “Aproximadamente o 66% do mineral e do óxido de litio contidos clasifícanse nas categorías superiores, segundo os estándares do Comité de Reservas Minerais (JORC)”, apuntaban.

A compañía espera, en base ás probas realizadas, unha mellora e expansión dos recursos actuais do proxecto, de uns 28 millóns de toneladas, “cunha concentración media de 1,05% de óxido de litio”.

A promotora conta coa mineira holandesa AMG como socia do proxecto, que será o maior xacemento de litio de espodumena de Europa. A iniciativa, para a que está prevista unha inversión de uns 236 millóns de dólares (uns 204 millóns de euros), foi declarada “estratéxica” segundo a lei comunitaria de materias primas críticas.

A folla de ruta da empresa pasaría por explotar catro xacementos cos que prevé extraer arredor de 1,5 millóns de toneladas de minerais durante os case quince anos de vida útil estimada da mina. Segundo os seus cálculos de Savannah, da mina extraeríase o litio necesario para medio millón de vehículos eléctricos ao ano.