Aagesen e Redeia, decisivas para case 1.000 millóns de investimento de Naturgy e Tasga en almacenamento
As centrais de bombeo que proxectan ambas empresas en Crecente, preto da fronteira con Portugal, requirirán de capacidade de acceso á rede para poder inxectar enerxía
La ministra para la Transición Ecológica, Sara Aagesen, descarta que Altri vaya a recibir ayudas públicas por parte del Gobierno en una visita a Vigo, acompañada del alcalde, el socialista Abel Caballero. Foto: Europa Press
Comentarios
Naturgy e Tasga presentaron recentemente dous grandes proxectos de hidroeléctrica reversible arredor do encoro de Frieira, preto da fronteira con Portugal. As instalacións requirirían de preto de 500 millóns de investimento cada unha e engadirían unha capacidade de almacenamento de arredor de 3,7 GWh no sector renovable galego.
A planta de bombeo de Naturgy, que se anunciou a principios de ano, tería unha capacidade de 485 megavatios e evacuaría a través dunha nova subestación nas inmediacións da SET Fontefría, posta en servizo en xaneiro por Rede Eléctrica no contexto da construción da nova interconexión entre Galicia e Portugal. Tasga, con unha central que terá entre 400 e 645 megavatios de potencia instalada dependendo da solución construtiva, adopta unha solución parecida, ao planear a liña de evacuación por Crecente, A Cañiza e Covelo ata a mencionada subestación de Fontefría. A compañía con sede en Santiago prevé investir entre 357 e 491 millóns.
Máis aló da sa competición pola concesión de augas no Miño, as dúas empresas lanzan os seus proxectos condicionados á capacidade de acceso á rede de transporte, xa que ningún ten garantido o seu punto de conexión, algo común ao resto de iniciativas de almacenamento hidráulico. A viabilidade das centrais e o avance na súa tramitación dependerá, por tanto, dos permisos para inxectar enerxía á rede.
O decreto ‘antiapagones’
O almacenamento está considerado unha das tecnoloxías clave para garantir a capacidade e estabilidade do subministro no proceso de transición cara a fontes renovables. Tasga, ao anunciar o seu proxecto de gigabatería, explicou que grazas aos xeradores síncronos da central, a instalación poderá regular a tensión e frecuencia da rede eléctrica, contribuíndo á súa estabilidade e evitando incidentes como o apagón do 28 de abril. E como a planta terá un arranque autónomo, tamén facilitaría a recuperación do subministro en caso de que se produzan.
Agora ben, para desenvolver o proxecto, ao igual que sucede con Naturgy, require de capacidade de acceso. As empresas do sector levan tempo esperando que o Ministerio para a Transición Ecolóxica, con Sara Aagesen á fronte, poñan en marcha un concurso de capacidade que lles garanta o punto de conexión e que se anunciou hai máis dun ano. O decreto antiapagones de finais de xuño, explican, era unha oportunidade para avanzar no reparto de capacidade que quedou desaproveitada.
Outras fontes empresariais piden, en sentido máis amplo, unha regulación que axilice e armonice os permisos para a posta en marcha destas instalacións. Indican que os proxectos necesitan dun marco normativo que acompase os procedementos de acceso á rede, a concesión hidráulica e a autorización administrativa, así como os mecanismos de retribución a este tipo de activos.
A presión da Xunta
A Xunta, pola súa parte, leva tempo presionando para que se reforce a rede de transporte en Galicia, algo que debería vir da man da nova planificación da rede de transporte 2025-2030, cuxo borrador se espera desde hai nove meses. A conselleira de Economía, María Jesús Lorenzana, non pensa singularmente nas tecnoloxías de almacenamento, senón nun volume máis amplo de proxectos que requiran dunha maior capacidade. O mes pasado, nunha xornada organizada polo Inega, dixo que en Galicia hai dez proxectos industriais en distintas fases de tramitación, algúns xa autorizados, pendentes unicamente de que se reforce a rede de transporte eléctrico.
“Son 1.200 MW que non están atendidos na planificación actual nin na súa modificación“, dixo a conselleira, que aludiu concretamente ás repotenciacións eólicas e aos novos proxectos industriais.
Redeia e a interconexión con Portugal
A central de Naturgy, no proxecto remitido ao Ministerio para a Transición Ecolóxica, prevé unha capacidade de almacenamento de 3,81 GWh, mentres que a de Tasga moveríase nun rango entre 3,7 GWh e 6,7 GWh. Ambas deseñan a súa evacuación no trazado da interconexión con Portugal que constrúe Redeia e que está contemplada na última planificación da rede de transporte da que fala Lorenzana –de feito, xa estaba recollida na anterior–.
En xaneiro, Red Eléctrica puxo en marcha a subestación de Fontefría, o enchufe que pretenden conseguir Tasga e Naturgy, pero para completar o eixe tamén se prevé unha nova subestación en Beariz, con entrada-saída da liña Cartelle-Mesón do Vento 2 a 400 kV, unha liña de dobre circuíto Beariz- Fontefría 400 kV, e a nova liña Fontefría 400 kV-Frontera portuguesa. Unha vez completada a conexión, a capacidade de intercambio elevarase nuns 1.000 MW. Nas vendas de enerxía, o saldo é moi favorable a España, que inxecta máis en Portugal do que recibe.
