EiDF, espectadora ante a fusión do seu prestamista BBVA e a súa socia Sabadell

EiDF observa dende a marxe a fusión inminente entre BBVA e Banco Sabadell. Ambas entidades negocian a creación dun xigante a nivel europeo con máis de 100 millóns de clientes en todo o mundo, dos cales uns 18 millóns están en España.

Os dous bancos veñen de unir os seus camiños cos de EiDF nos últimos anos. No caso do Banco Sabadell, a entidade presidida por Josep Oliú comparte a condición tanto de prestamista como de socia coa empresa galega especializada en proxectos de enerxía solar fotovoltaica.

O vínculo de EiDF con Sinia Renovables

En concreto, EiDF contou con Sinia Renovables, división de enerxía eólica e solar de BS Capital (holding inversor do Banco Sabadell), como socia nos últimos anos. Comezos de 2021 marcaron a firma dun acordo pioneiro en España para financiar a construción a gran escala de instalacións de autoconsumo industrial mediante contratos de venda de enerxía a longo prazo (ppa) a un prezo pactado.

Este acordo incluía a financiación de 18 instalacións de autoconsumo de 23,6 megavatios de potencia. EiDF artellaba a súa inversión nestes proxectos a través de seis sociedades que, desde entón, pasaron a contar con Sinia Renovables como accionista, desembarcando cunha participación do 24.9%.

Posteriormente EiDF e Sinia Renovables incrementaron os seus lazos e extendiron o seu acordo a outras 15 instalacións. Este movemento, valorado en 10,9 millóns de euros, posicionou ao Banco Sabadell como o primeiro investidor de España en débeda alternativa en autoconsumo renovable.

A nova rolda de operacións entre EiDF e Banco Sabadell tivo lugar en maio de 2023. A compañía galega anunciou a compra da participación do 24,9% de Sinia Renovables nun total de 12 sociedades SPV que promoven 34 proxectos fotovoltaicos que suman unha potencia de 42,74 megavatios. Estes activos, desde entón totalmente controlados por EiDF, teñen firmados ppas por valor de 38,2 millóns de euros a 15 anos, que ascenden ata os 53 millóns de euros coa venda de excedentes.

De Banco Sabadell a BBVA

Ademais de Banco Sabadell, BBVA tamén figurou na lista de financiadores de EiDF. Neste sentido, a firma presidida por Fernando Romero recoñece que “incumpre determinados ratios”, como é o da débeda financeira neta sobre o ebitda “que esixe cada un dos contratos de préstamo outorgados por TREA Direct Lending e o ratio asociado a un préstamo do BBVA“.

É por iso que desde EiDF, na súa memoria anual, aseguran que o grupo “podería ter que facer fronte á devolución da totalidade da débeda. Con todo, o grupo, no caso de TREA, obteu unha dispensa con anterioridade á data de peche do 2023 que o exime de cumprir coas consecuencias derivadas do incumprimento do ratio. No caso de BBVA o grupo non obteu dispensa, polo que clasificou no pasivo corrente a totalidade da débeda asociada a ese contrato”, indica EiDF, que cifra en uns dez millóns de euros esta cantidade.

Ademais deste crédito, EiDF deixou a súa pegada en BBVA coa implantación na sede central do banco en Madrid dunha instalación fotovoltaica de 523 módulos que suman unha potencia de 175,21 kilovatios e cunha capacidade de xeración de 236.182 kilovatios/hora anuais. Esta operación equivale á plantación de 8.030 árbores ou ao consumo eléctrico anual de 126 fogares.