Froiz, a terceira maior cadea de supermercados de Galicia, duplica o dividendo tras disparar un 22% o seu beneficio

Froiz segue o seu camiño cara aos 1.000 millóns de facturación. A cadea de supermercados pechou 2025 cunha facturación de 921 millóns, un 3% por encima dos 895 millóns alcanzados o ano anterior, e un incremento do 22% do seu beneficio, que rozou os 24 millóns fronte aos 19,61 millóns de 2024. 

Segundo figuran na documentación depositada ante o Rexistro Mercantil, consultada por Economía Digital Galicia a través da plataforma einforma.com, non seguiu a mesma senda de crecemento o resultado de explotación, o propio da actividade da empresa, que se reduciu un 31% ata os 17,43 millóns. A mesma tendencia seguiu o ebitda, que pasou dos 43,66 millóns aos 36,75. 

“Tendo en conta a actual conxuntura económica e a estrutura e recursos da empresa, os resultados obtidos considéranse satisfactorios” explican os xestores na memoria que acompaña as contas. Para este 2026 a compañía espera unha “evolución favorable da actividade económica e comercial en todos os sectores que permita manter ou mesmo mellorar as cifras do ano 2025”. 

O forte incremento do beneficio tamén se trasladou ao peto da familia propietaria. O dividendo con cargo aos resultados de 2025 elevouse ata case 4 millóns de euros, fronte aos 2 millóns do exercicio anterior. 

A compañía manexa uns activos de 375 millóns, un 30% máis que o exercicio anterior, mentres que o patrimonio neto creceu case un 22%, ata os 162 millóns. 

Rede comercial

A compañía fundada por Magín Froiz é a terceira maior cadea de supermercados de Galicia, tanto por implantación territorial, onde conta coa rede máis extensa na provincia de Pontevedra, como por ingresos. 

Ao peche de 2025, a compañía contaba con 348 puntos de venda, sete máis que un ano antes, que se reparten entre Madrid, Castela e León, Castela-A Mancha e o norte de Portugal. Do total de establecementos, 268 eran centros propios: 249 supermercados, sete hipermercados e 12 establecementos de cash & carry. A esta estrutura sumábanse outras 80 tendas franquiciadas, operadas baixo distintas enseñas. 

O crecemento da rede apoiouse especialmente na apertura de novos supermercados durante o exercicio, con varias incorporacións en León, ademais de novos establecementos en Cerdedo (Pontevedra) e Leganés (Madrid). A finais de ano, Froiz reforzou o seu negocio coa apertura dun novo Cash Froiz en Santiago de Compostela.

En canto á plantilla, o pasado exercicio, segundo figura na memoria, a compañía contaba cun total de 6.220 traballadores, un 4% máis que o ano anterior. 

Froiz, entre os supermercados máis baratos de Portugal

Froiz mantén unha presenza consolidada en Portugal, mercado no que desembarcou en 1996 e onde concentra a súa actividade no norte do país. Ao peche de 2025, a compañía contaba con 19 establecementos: 18 supermercados e un centro Cash & Carry.

A cadea está presente nunha decena de cidades portuguesas, entre elas Porto, Braga, Guimarães, Viana do Castelo e Vila Nova de Gaia, e conta ademais cunha plataforma loxística propia en Braga para abastecer a súa rede.

Un estudo da asociación de consumidores DECO PROteste, publicado a principios de ano, sitúa a cadea como o segundo supermercado en liña máis barato de Portugal xunto a Pingo Doce e só por detrás de Continente. O informe elaborouse a partir da análise diaria ao longo de todo o 2025 dunha cesta de máis de 200 produtos en nove supermercados que operan no país.