Reganosa entra no sector renovable coa compra de tres hidroeléctricas en Aragón.
O grupo propietario da regasificadora de Mugardos fíxose coa sociedade Saltos de Cinca a Plenium Partners e Bankinter Investment.
Reganosa fai súa tres centrais hidroeléctricas en Aragón.
Comentarios
Operación de alcance para Reganosa, a dona da regasificadora de Mugardos, antes de rematar o ano. O grupo galego desembarca no sector da xeración renovable coa adquisición de tres centrais hidroeléctricas localizadas en Aragón e sostidas baixo a sociedade Saltos del Cinca. Os vendedores son Plenium Partners, xestor do vehículo de investimento alternativo Helia II, FCR, e o seu socio Bankinter Investment SGEIC.
A compañía participada polo Grupo Gadisa, Xunta e Sonatrach fixo coas centrais Arias I, Arias II e Ariéstolas, que conforman o sistema hidroeléctrico Saltos del Cinca, situado na provincia de Huesca.
Activos renovables
En conxunto, suman case 19 megavatios (MW) de potencia instalada, distribuída de forma practicamente homoxénea entre as tres instalacións e soportadas por un equipo propio de persoal de mantemento e operación das centrais. Con esta operación, Reganosa destacou que avanza na diversificación da súa actividade, reforza o seu posicionamento na transición enerxética e engade á súa carteira activos renovables complementarios aos proxectos que xa desenvolve neste ámbito.
Así mesmo, a incorporación de xeración hidroeléctrica permitirá integrar unha fonte renovable e competitiva nos consumos enerxéticos do grupo, mellorar a súa rendibilidade e ampliar as súas capacidades técnicas e de prestación de servizos a terceiros, tanto no mercado nacional como no internacional.
