Abanca aproba o cuarto dividendo polos beneficios de 2025 e repartirá 93 millóns.
Juan Carlos Escotet defende que mantén unha política retributiva "moderada" e por debaixo da media da banca española e europea.
Xunta Xeral de Accionistas de Abanca, presidida por Juan Carlos Escotet / Abanca
Comentarios
O consello de administración de Abanca aprobou o pasado luns repartir un dividendo de 92,8 millóns a conta dos beneficios rexistrados pola entidade financeira no exercicio de 2025. É o cuarto dividendo que mobiliza o banco con cargo ás ganancias do curso, que se pechou cun resultado positivo de 902,4 millóns, o que tería sido o máis alto da súa historia se se descontan os extraordinarios, como o badwill xerado na adquisición de Eurobic e que disparou os beneficios de 2024 máis alá dos 1.000 millóns.
O novo dividendo abonarase o venres 30 de xaneiro e retribuirá 0,04211 euros brutos por acción, descontada a autocarteira. Unha vez pagado, Abanca terá distribuído 360,8 millóns a conta das ganancias de 2025. O 2 de maio de 2025 repartiu 87,9 millóns; o 1 de agosto, 82,8 millóns; e o 24 de decembro, o máis elevado, 97,3 millóns. Juan Carlos Escotet, cun 43,5% dos títulos; e o holding familiar do banqueiro, Escotet Family Office, controlan case o 85% das accións.
O presidente de Abanca sostivo durante a presentación dos resultados anuais do grupo que a política de dividendo é moderada, o que contribúe positivamente á solvencia e dispoñibilidade de recursos da entidade financeira. Profundando neste argumento, destacou que a remuneración ao accionista sitúase moi por debaixo da media da banca europea e da banca española.
