A ‘startup’ Slimop Space, impulsada pola aceleradora da Xunta, recibe o Premio Nacional de Industria.

A startup Slimop Space, impulsada pola Business Factory Aero (BFAero) –aceleradora da Xunta na que participa a través do Igape e Xesgalicia–, recibiu o Premio Nacional de Industria Bien hecho en España na categoría de Emprendemento Industrial, durante o VIII Congreso Nacional de Industria que se celebra ata o 5 de febreiro en Bilbao.

Este galardón recoñece a empresas de nova creación con gran capacidade innovadora para desenvolver proxectos industriais con alto valor engadido e que fortalecen a competitividade, a sostibilidade, a transformación dixital e o desenvolvemento de capacidades produtivas e tecnolóxicas propias.

A conselleira de Economía e Industria, María Jesús Lorenzana, felicitou á empresa polo premio recibido ao tempo que puxo en valor o recoñecemento que supón para Slimop Space a obtención deste distintivo que se entrega ás empresas de nova creación pola súa capacidade innovadora. “Un dos piares sobre os que se asenta a política industrial avanzada que vai da man da empresa, da tecnoloxía e do talento que temos e do que queremos atraer a Galicia, e que nos consolida como un territorio referente na aceleración de proxectos tecnolóxicos de alto impacto”.

Este recoñecemento supón un importante respaldo á traxectoria da compañía e reforza o papel da BFAero como plataforma de apoio ao emprendemento tecnolóxico e industrial orientado á soberanía tecnolóxica. BFAero é hoxe unha alavanca estratéxica de creación e aceleración empresarial no marco da Iniciativa Estratéxica en Seguridade, Defensa e Aeroespazo 2025-2030, impulsada pola Consellería de Economía e Industria, a través do Igape (Instituto Galego de Promoción Económica) e Xesgalicia.

Slimop Space forma parte do ecosistema de Business Factory Aero desde a súa sexta edición, na que participou no itinerario de Aceleración e, actualmente, foi seleccionada para a sétima edición do programa no itinerario de Consolidación.

A primeira edición dos Premios Nacionais de Industria Bien hecho en España, organizados polo Ministerio de Industria e Turismo, recoñecen iniciativas empresariais que destacan pola súa contribución ao fortalecemento da industria española, a innovación tecnolóxica, o desenvolvemento de solucións con alto impacto económico e social, e fan da excelencia unha seña de identidade da industria.

Mellor aceleradora de España 

Recoñecida por segundo ano consecutivo como a mellor aceleradora de España no ranking nacional Funcas, o programa demostrou un forte impacto tanto económico como de innovación en Galicia.

Desde a súa posta en marcha no ano 2018, apoiou 58 proxectos, creou 15 novas empresas tecnolóxicas e promoveu o traslado a Galicia de 13 empresas e a creación de máis de 270 empregos cualificados. Os proxectos da 5ª e 6ª edición captaron máis de 14 millóns de euros de investimento.