A Xunta reivindícase tras os datos do paro en Galicia.
O secretario xeral de Emprego e Relacións Laborais, Pablo Fernández, pon en valor que Galicia pechou novembro con 111.572 desempregados, o que supón a cifra máis baixa de toda a serie histórica.
O secretario xeral de Emprego e Relacións Laborais, Pablo Fernández / Xunta
Comentarios
A Consellería de Emprego saca peito tras os últimos datos do paro en Galicia. A través dun comunicado, o secretario xeral de Emprego e Relacións Laborais, Pablo Fernández, destacou que Galicia rexistrou a menor cifra de desempregados nun mes de novembro na serie histórica (desde 1996), cun total de 111.572 parados.
Estes números alcanzáronse despois de que a comunidade liderase a caída do paro de forma porcentual en España no mes de novembro, cun descenso do 1,6%, 1.814 persoas menos. Neste sentido, Fernández subliñou que o paro cae máis en Galicia que en España tanto en comparativa mensual como interanual (-8,35%).
O representante da Xunta tamén puxo en valor que o paro redúcese no último ano nas catro provincias, as sete grandes cidades e todos os sectores. Apunta que mulleres, menores de 30 anos e parados de longa duración alcanzan as cifras máis baixas na serie para este mes.
Aínda que a Seguridade Social perdeu en Galicia 2.346 cotizantes en novembro respecto ao mes anterior, o Goberno galego resalta que gaña 19.516 afiliados en comparativa con novembro de 2024, co mellor novembro desde que hai rexistros ao situarse en 1.100.638 cotizantes.
