A Xunta reprocha a rivalidade entre Vigo, Santiago e A Coruña polos aeroportos: “Compiten pola mesma conexión”

O director de Turismo de Galicia, Xosé Manuel Merelles, sinalou a “visión localista” das tres cidades de Galicia con aeroportos como un dos principais problemas dos últimos anos na comunidade. Todo isto no contexto dunha semana na que o Clúster de Turismo realizou unha proposta para especializar as tres terminales galegas.

Nunha entrevista á Cadena SER, recollida por Europa Press, Merelles explicou que dentro da comisión de coordinación aeroportuaria de Galicia se creou un grupo de traballo no que están saíndo elementos que “van poder permitir avanzar e tratar de coordinar mellor os aeroportos, atraer máis compañías aéreas e lograr conexións directas co estranxeiro”.

Neste sentido, o director de Turismo apuntou á “visión localista” dos municipios galegos con aeroportos –Vigo, Santiago e A Coruña– como un dos principais problemas dos últimos anos, xa que, asegura, “compiten entre eles ás veces pola mesma liña ou conexión”.

Respecto aos datos turísticos desta Semana Santa, enmarcada na guerra no Oriente Próximo, que xerou a subida do prezo dos combustibles –entre outras consecuencias–, Merelles sinalou que “se están cumprindo as previsións”.

“Hai certo retraemento quizais porque os prezos dos combustibles son elevados e hai que ter tamén en conta que nestas vacacións curtas hai moitos desprazamentos en automóvil, pero nos lugares máis turísticos a ocupación está no 80%, mentres que no resto os datos son superiores ao 60%”, detallou, citando a información do Clúster do Turismo.

Ademais, destacou que cada vez máis zonas da Comunidade “ganan protagonismo” nestas datas, algo “moi positivo” porque a actividade turística “desconcentra” e todo o territorio supón un “atractivo” para os visitantes.

Visita do Papa León XIV 

Neste sentido, Xosé Merelles foi preguntado polos avances de cara ao próximo Ano Xacobeo 2027. Ao respecto, lamentou que a “inacción” do Goberno central –ao non aprobar os orzamentos– está a producir un “retraso á hora de que as empresas poidan desgravar e colaborar con eles” para que sexa “un dos maiores da historia”.

“A pesar de que nos reunimos con máis de medio cento de compañías que queren colaborar con nós, todo isto non se pode materializar precisamente por ese retraso na aplicación das desgravacións”, desenvolveu.

Consultado pola posible visita a Galicia do Papa, León XIV, durante a celebración do Ano Santo, o director de Turismo de Galicia mostrouse optimista. “Parece que si que vai vir, iso é o que nos transmiten interlocutores”, afirmou.

Regulación fluxos turísticos

Tamén, Merelles abordou os avances na regulación dos fluxos turísticos en zonas como o faro de Fisterra, indicando que están a ultimar a primeira fase deste plan que pasará pola limitación de accesos, por exemplo, a vehículos.

Nesta liña, considerou “positivo” que se tomen decisións como esta en zonas como pode ser o Casco Histórico de Santiago e o contorno da catedral para evitar aglomeracións. Igualmente, subliñou que aínda que “hai momentos de elevada concentración nunca viron saturación”.