Estas son as 14 oficinas de Correos en Galicia onde poderán presentarse solicitudes de regularización de migrantes.

Catorce oficinas de Correos en Galicia colaboran desde finais de abril no proceso extraordinario de regularización administrativa de persoas migrantes. Esta medida, segundo lembra a empresa pública nun comunicado, está dirixida a persoas en situación administrativa irregular e solicitantes de protección internacional que se atopaban en España antes do 1 de xaneiro de 2026 e que acrediten unha permanencia continuada de polo menos cinco meses.

Para poder solicitala, deberán carecer de antecedentes penais e non supoñer unha ameaza para a orde pública, a seguridade ou a saúde pública. Ata o 30 de xuño, estas oficinas, situadas en capitais de provincia e municipios de máis de 50.000 habitantes, permiten a presentación presencial de solicitudes de regularización.

Oficinas de Correos galegas nas que presentar a solicitude

Correos lembra que é imprescindible obter previamente cita a través da páxina web do Ministerio de Inclusión, Seguridade Social e Migracións ou chamando ao teléfono 060. Unha vez obtida a cita previa, as persoas interesadas poderán presentar a súa solicitude xunto coa documentación requirida nas oficinas habilitadas. En Galicia estas oficinas son: 

• A Coruña: oficina principal da Marina, Sucursal Renfe e O Ventorrillo.
• Oficina principal de Ferrol.
• Santiago de Compostela: O Franco, Conxo e Xunta.
• Pontevedra: oficina principal e Xunta.
• Vigo: oficina principal, Calvario e praza de España.
• Oficinas principais de Lugo e de Ourense.

As oficinas de Correos habilitadas para este proceso foron seleccionadas en coordinación co Ministerio, tendo en conta as estimacións de demanda e as necesidades en materia de estranxeiría en cada provincia.

Os profesionais de Correos que participan neste procedemento recibiron formación específica para garantir unha atención adecuada, incluída a posibilidade de actuar en representación das persoas interesadas na tramitación das súas solicitudes.

O proceso enmárcase na prestación dos Servizos de Interese Económico Xeral (SIEG) asignados a Correos tras a modificación da Lei Postal aprobada en xullo de 2025, así como no contrato-programa que forma parte do desenvolvemento desta reforma, aprobado o pasado 2 de xuño.

Con esta iniciativa, Correos destaca que reforza a súa contribución á cohesión territorial, económica e social, así como á sustentabilidade e ao benestar público, en liña coa súa misión de servizo público e cos obxectivos recollidos no seu Plan Estratéxico 2024-2028.