A patronal Seopan sitúa a Galicia como líder en investimento en vivenda pública este ano con 400 millóns.

Galicia encabeza a listaxe nacional de territorios con maior investimento en vivenda pública cun investimento de 400 millóns no primeiro semestre de 2026, segundo datos da Asociación de Empresas Constructoras e Concesionarias de Infraestruturas (Seopan). A comunidade tería incrementado o orzamento licitado un 86% respecto ao do mesmo período do ano pasado, cando se alcanzaron os 57 millóns durante os primeiros seis meses do ano.

A licitación pública de vivenda en España alcanzou durante o primeiro semestre deste ano os 1.292 millóns de euros, un 63% máis que no mesmo semestre do 2025, cando sumaron 791 millóns. Seguen a Galicia no ‘top 3’ da listaxe a Comunidade de Madrid, con 244 millóns –máis do dobre dos 110 millóns do ano anterior– e Illas Canarias, onde o orzamento se incrementou dos 82 millóns aos 196 millóns.

Galicia adianta ao País Vasco 

Na comparativa entre ambos semestres aprecíase un cambio significativo no mapa da licitación de vivenda. Galicia escalou posicións ata arrebatar o liderado ao País Vasco, que no primeiro semestre de 2025 encabezaba o ranking cun orzamento de case 207 millóns de euros. Madrid e Illas Canarias manteñen en 2026 as posicións que xa ocupaban un ano antes, mentres que Galicia pasou da sétima posición a situarse á cabeza da listaxe tras multiplicar por sete o orzamento.

Segundo os datos de Seopan, Galicia licitou 400 millóns de euros a través de 33 actuacións, dos que 391 millóns corresponden á administración autonómica e os 9 millóns restantes ás administracións locais. O impulso da comunidade produciuse principalmente polas provincias de Pontevedra, que sumou un total de 198 millóns (17 obras), e da Coruña, con 151 millóns (13 obras).

II Pacto de vivenda de Galicia

Ao final de xaneiro o Consello da Xunta deu luz verde ao II Pacto de vivenda de Galicia co que o Goberno galego prevé investir “case 2.000 millóns de euros” entre 2026 e 2030. Os plans do Executivo autonómico son que estes fondos “permitan mobilizar outros 5.000 millóns por parte de empresas e particulares”, ademais de crear ou manter arredor de 60.000 postos de traballo. 

Do total da dotación do plan, o 83%, uns 1.360 millóns, corresponden a fondos da comunidade. O resto procederán de fondos estatais (241 millóns) e europeos (100 millóns).

A maior parte deste investimento procederá de fondos propios da comunidade autónoma, segundo explicou. Serán 1.630 millóns de euros, que supoñen o 82,67% do total. Os fondos estatais alcanzarán a cifra de 241 millóns e os europeos os 100 millóns de euros.

Segundo explicaba entón o presidente da Xunta, Alfonso Rueda, un dos obxectivos do pacto é que a comunidade alcance as 10.000 vivendas públicas en 2030, o que suporía sumar uns 2.000 novos inmobles ás 8.000 que o Executivo autonómico prevé que conformarán o parque público residencial en 2028. 

Vivendas públicas en 2026

Ao final de xaneiro a Xunta tamén anunciou a licitación de 55 proxectos este 2026 para construír 2.688 vivendas por case 500 millóns. Segundo a folla de ruta do Goberno galego, no primeiro trimestre estaba prevista a licitación de 16 proxectos para 979 vivendas por importe de uns 185 millóns de euros. Neste primeiro paquete destacaban as cidades de Vigo e A Coruña, cun investimento de 50 millóns. 

No segundo trimestre o investimento ascendería a 185 millóns para erguer unhas 1.005 vivendas. Neste período sobresae Lugo, con máis de 76 millóns de euros. No terceiro trimestre, serán nove proxectos, por 77 millóns, co que se dará lugar a 418 novos fogares distribuídos en concellos dos contornos das grandes cidades.

Por último, a Xunta deixa 10 proxectos para licitar no cuarto trimestre, para construír un total de 286 vivendas: en Ames (140 por 26 millóns), Santiago (96 vivendas) e 50 en Sada, Viveiro, Baiona, Forcarei e Lalín.